भारतीय क्वारेन्टाइनमा रहेर आमाको किरिया गरिरहेका दार्चुलाको शैल्यशिखर नगरपालिका-१ का वासुदेव भट्ट घर आउन पाउने भएका छन् । गृह मन्त्रालयले भारतको क्वारेन्टाइनमा रहेका भट्टलाई आमाको मृत्यु संस्कारका लागि नेपाल ल्याउने वातावरण मिलाउन जिल्ला प्रशासन कार्यालय दार्चुलालाई निर्देशन दिएको हो ।

आमाको मृत्यु भएपछि भट्ट नेपाल प्रवेश नपाएर दार्चुलापारि भारतले सरकारले बलुवाकोटमा बनाएको क्याम्पको क्वारेन्टाइनमै किरिया बसेका छन् । उनकी आमाको मृत्यु भएको आज ३ दिन भएको छ । आमाको मृत्युपछि महाकालीमा हामफालेर घर आउने खोजेपछि भारतीय सुरक्षाकर्मीले रोकेका थिए । त्यसपछि उनी त्यहीँ आमाको मृत्यु संस्कारमा बसेका थिए ।

दार्चुलाका सहायक प्रमुख जिल्ला अधिकारी टेक सिंह कुँवरले वासुदेवलाई घर ल्याउने प्रकिया सुरु भइसकेको बताए । उनले गृहमन्त्रालयको निर्देशनपछि भारतीय अधिकारीसँग कुराकानी भइसकेको र उनी आजै दार्चुला आइपुग्ने बताए । कुँवरले भट्ट दार्चुला आएपछि आवश्यक परीक्षण तथा व्यवस्था गरेर घर पुर्‍याइने जानकारी दिए ।