जनकपुरधाम, ३ वैशाख-राष्ट्रिय जनता पार्टी नेपाल (राजपा)ले उपत्यकालगायतका स्थानमा फसेका नागरिकको राहतका विषयमा सरकारले गरेका निर्णय प्रभावकारी बन्न नसकेको बताएको छ । राजपा अध्यक्ष मण्डलका संयोजक शरतसिंह भण्डारीले बुधबार एक विज्ञप्ति जारी गर्दै काठमाडौंबाट पैदल हिँडेर आफ्नो जिल्ला गइरहेका जनताका पक्षमा गम्भीर बन्दै समस्या समाधान गर्न पनि सुझाव दिएका छन् ।

‘लकडाउनमा दिनहुँ काठमाडौंबाट पैदल यात्रा गरी हजारौँको संख्यामा सर्वसाधारण नागरिक आ-आफ्नो जिल्लातर्फ गइरहेका छन् । जसले एकातिर विभिन्न ठाउँमा झडपको स्थिति सिर्जना भएको छ भने अर्कोतिर स्थानीय ठाउँहरूमा त्रासको पनि अवस्था छ’, विज्ञप्तिमा भनिएको छ, ‘त्यसकारण लकडाउनलाई सफल बनाउन यस विषयमा सरकार गम्भीर भई यसको उचित समाधान खोज्नुपर्छ ।’

व्यापक रूपमा सुरक्षाकर्मी परिचालन गरी सीमा नाकामा थप कडाइ गर्न राजपाले माग गरेको छ । संयोजक भण्डारीले लकडाउनको समयसीमा बढाउने निर्णय स्वागत योग्य रहेको भन्दै सबैलाई यसका पूर्णरूपमा पालना गर्न पनि आग्रह गरेका छन् ।