बुटवल, ३ वैशाख-प्रदेश–५ ले सबै स्थानीय तहलाई कोरोना विशेष अनुदान दिने निर्णय गरेको छ । प्रदेश मन्त्रिपरिषद्को आज बसेको बैठकले स्थानीय तहलाई कोरोना विशेष अनुदान दिने निर्णय गरेको हो ।

प्रदेशभरीका १ सय ९ स्थानीय तहलाई १३ करोड र १२ जिल्ला समन्वय समितिलाई ६० लाख गरी १३ करोड ६० लाख रुपैयाँ अनुदान दिने निर्णय भएको मुख्यमन्त्रीका प्रेस सल्लाहकार शेरबहादुर केसीले जानकारी दिए ।

बैठकले बुटवल, घोराही, तुलसीपुर उपमहानगरपालिका तथा सिद्धार्थनगर नगरपालिकालाई २०/२० लाख र नेपालगञ्ज उपमहानगरपालिकालाई २५ लाख रुपैयाँ अनुदान दिने निर्णय गरेको हो । प्रदेशभित्रका अन्य ३१ नगरपालिकालाई १५/१५ लाख र ७३ गाउँपालिकालाई १०/१० लाख रुपैयाँ अनुदान दिने बताइएको छ ।