काठमाडौं, ३० चैत-पूर्वराजा ज्ञानेन्द्र शाहले कोरोना रोकथाम, राहत तथा उपचार कोषमा २ करोड रुपैयाँ जम्मा गराएको छ । ज्ञानेन्द्रले हिमानी कोषमार्फत कोषमा उक्त रकम जम्मा गरेका हुन् ।

पूर्वराजा शाहले ट्विटमार्फत् प्रधानमन्त्री कोरोना रोकथाम, राहत तथा उपचार कोषमा पूर्वघोषित सहायता रकम हिमानी कोषमार्फत् आइतबार हस्तान्तरण बताएका छन् ।

हिमानी कोषका कर्मचारीले प्रधानमन्त्री तथा मन्त्रिपरिषदको कार्यालयका सचिव महेन्द्र गुरागाईंलाई उक्त रकम बराबरको चेक हस्तान्तरण गरेको उनले उल्लेख गरेका छन् ।

‘प्रधानमन्त्री कोरोना रोकथाम, राहत तथा उपचार कोषमा पूर्व घोषित सहायता रकम हिमानी कोष मार्फत् आज हस्तान्तरण गरिएको छ’ उनको ट्विटमा भनिएको छ ‘हिमानी कोषका कर्मचारीहरूले प्रधानमन्त्री तथा मन्त्रीपरिषदको कार्यालयका सचिव महेन्द्र गुरागाईँलाई उक्त रकम बराबरको चेक हस्तान्तरण गरेका छन् ।’