विराटनगर, माघ २८–नेपाल भ्रमण वर्ष–२०२० लाई प्रवद्र्धन गर्ने उद्देश्यसहित विराटनगर सीमाक्षेत्रमा ‘फेमिली’ होटल सञ्चालनमा ल्याइएको छ । युवा नेता मोहम्मद फैयाजले पाकिजा होटल एण्ड फास्ट फुड सञ्चालनमा ल्याएका हुन् । होटलको प्रदेश–१ का सांसद जयराम यादव र समाजवादी पार्टी मोरङका अध्यक्ष राजकुमार यादवले उद्घाटन गरे । जोगबनी भएर आउने भारतीय र आन्तरिक पर्यटकलाई लक्षित गरी फेमिली रेस्टुरेन्ट सञ्चालनमा ल्याइएको जनाइएको छ ।
होटलमा मध्यपान र धुम्रपान निषेध गरी पूर्ण पारिवारिक वातावरण उपलब्ध गराइने सञ्चालक फैयाजले बताए । होटलमा आउने आगन्तुकलाई प्रदेश एकका साथै देशभरिका पर्यटकीय स्थलहरूका बारेमा जानकारी गराइने उनले बताए । त्यसका लागि पर्यटकीयस्थलसम्बन्धी जानकार युवाहरूलाई रोजगार उपलब्ध गराइएको तथा होटल परिसरमा पर्यटकीय स्थलहरूको पोस्टरहरूसमेत राखिएको छ ।
