विराटनगर, चैत २६–विश्भर माहामारीका रुपमा फैलिएको कोरोना भाइरस(कोभिड–१९) रोकथाम, प्रतिरक्षा र उपचारका लागि प्रदेश १ सरकारले स्थापना गरेको ‘कोरोना जनसुरक्षा कोष’ मा मोरङका विभिन्न सहकारी संघ÷संस्थाको तर्फबाट साढे ५ लाख रुपैयाँ योगदान गरिएको छ ।

प्रदेश नं. १ ले प्रदेश सरकारले स्थापना गरेको कोषमा जिल्लाका ४१ सहकारी संघ संस्थाहरुको तर्फबाट ५ लाख ५५ हजार ५ सय ५५ रुपैयाँ योगदान गरिएको हो । उक्त रकम बराबरको चेक राष्ट्रिय सहकारी महासंघका उपाध्यक्ष रमेशप्रसाद पोखरेल, जिल्ला सहकारी संघ मोरङका अध्यक्ष डिल्ली पोखरेलले प्रदेश नं. १ का मुख्यमन्त्री शेरधन राईलाई हस्तान्तरण गरेका छन् ।

सहकारी संघ÷संस्थाहरुले सामाजिक उत्तरदायीत्व अन्तर्गत प्रदेश सरकारले स्थापना गरेको उक्त कोषमा रकम जम्मा गरेको जिल्ला सहकारी संघ मोरङका अध्यक्ष पोखरेलले जानकारी दिए । उनले कोषमा जिल्ला बचत तथा ऋण सहकारी संघ मोरङ, सृष्टि, मेघा, रारा बचत तथा ऋण सहकारी संस्था लिमिटेड, बरगाछी, अरनीको बहुदेश्यीय सहकारी संस्था लिमिटेड, बुद्धोदय बचत तथा ऋण, राष्ट्रसेवक बहुमुखि, तुलसी बहुदेश्यीय, बृहत बचत तथा ऋण, स्टर्न स्टार कृषि सहकारीलगायतका ४१ सहकारी संघ संस्थाहरुको सहयोगमा रकम जम्मा गरिएको बताए ।

कोरोना भाइरसको रोकथाम, प्रतिरक्षा र उपचारका लागि प्रदेश सरकारले कोषको स्थापना गरेको हो । कोष राष्ट्रिय बाणिज्य बैंक विराटनरको कोरोना जनसुरक्षा कोष खाता नं २१२०००५८८१०१ मा जम्मा गर्न तथा फोन पेबाट पनि रकमजम्मा गर्न सकिने मुख्यमन्त्री तथा मन्त्रीपरिषदको कार्यालयले जनाएको छ । उक्त कोषमा हाल सम्म ११ करोड ५९ लाख १९ हजार ८९ रुपैयाँ जम्मा भएको मुख्यमन्त्री कार्यालयले जानकारी दिएको छ ।