धनुषामा एक जना वडा अध्यक्षलाई ‘क्वारेन्टाइन’मा राखिएको छ । आइतबार भारतबाट फर्केर घरमा बसेका जनकनन्दनी गाउँपालिका वडा नं. २ का वडाध्यक्ष भोगेन्द्र पाठकलाई स्थानीयको दबावमा ‘क्वारेन्टाइन’मा राखिएको हो ।

भारतको मधुवनीबाट आइतबार दिउँसो उनी घर फर्केपछि स्थानीय त्रसित बनेका थिए । इलाका प्रहरी कार्यालय खजुरीमा स्थानीयले वडाध्यक्ष पाठक भारतबाट आएको जानकारी गराएपछि प्रहरीको सक्रियतामा उनलाई ‘क्वारेन्टाइन’मा राखिएको जनकनन्दनी गाउँपालिकाका प्रशासकिय अधिकृत कुलानन्द झाले जानकारी दिए ।

उनलाई सोही गाउँपालिका वडा नं.४ स्थित उच्च माध्यमिक विद्यालय खजुरीमा स्थापना गरिएको ‘क्वारेन्टाइन’मा राखिएको छ । वडा अध्यक्षसँगै सो ‘क्वारेन्टाइन’मा अहिले भारतबाट फर्केर आएका ९ जना छन् । धनुषामा १६ वटा ‘क्वारेन्टाइन’स्थल वनाइएको छ । जसमा अहिले ८८ जना रहेका छन् ।