सप्तरीको राजविराज नगरपालिका–५ का बासिन्दाहरूले बाहिरी व्यक्तिहरूलाई आवतजावतमा निषेध गरेका छन् । कोरोनो भाइरसबाट जोगिन सरस्वती टोलपारि भलुवाही नदी पूर्व टोलमा युवाहरूले टोल प्रवेश गर्ने मूलबाटो नै छेकिने गरी बाँसको ढाट लगाएर आवत–जावत पूर्ण रूपमा निषेध गरेका हुन् ।

लकडाउनको समयमा अपरिचित व्यक्तिहरूको आवत–जावतसँगै मदिरा सेवन गर्ने उद्देश्यले समेत आउने गरेकाले स्थानीय युवाहरू एवं टोलवासीको सक्रियतामा टोल प्रवेश निषेध गरिएको वडा नम्बर ५ का वडा सदस्य पार्थो सरकारले जानकारी दिएका छन् । उनले लकडाउनको अवधिभर अति आवश्यक कामबाहेक अन्य अवस्थामा घरबाट समेत ननिस्किन टोलवासीलाई अपिल गरेका छन् ।

स्थानीय युवाको पहलका कारण यो अभियान निकै प्रभावकारी भइरहेको छ । कोही बाहिर गएका पनि छैनन् र बाहिरबाट आउनेहरू पनि बाटो छेकेका कारण आउन सकेका छैनन् । सरकारले गरेको लकडाउनको अवधिमा समेत टोलमा आवागमन भइरहेकाले रोक लगाउनुपरेको स्थानीयवासीको भनाइ छ ।

राजविराज नगरपालिका–५ का बासिन्दाहरूको यो अभियान अन्य वडामा पनि सञ्चालन गर्ने माग उठ्न थालेको छ । अभियानलाई स्थानीय प्रशासनले पनि सहयोग गरेको छ ।