विराटनगर, चैत १५–वीपी कोइराला स्वास्थ्य विज्ञान प्रतिष्ठान धरानबाट कोरोनाको परीक्षण गर्न पठाइएको १६ जनाको रिपोर्ट आएको छ । रिपोर्ट आएका सबै १६ जनामा नै कोरोनाको संक्रमण नभएको पाइएको छ ।

प्रतिष्ठानका सह प्रवक्ता अशोक ऐरले जानकारी दिएअनुसार काठमाण्डौंस्थित प्रयोगशालामा पठाइएकोमा १६ जनामै कोरोना भाइरस संक्रमण नभएको रिपोर्ट आएको हो ।

प्रतिष्ठानका सहायक अस्पताल निर्देशक डा. विकास साहका अनुसार प्रतिष्ठानबाट परिक्षणकालागी पठाइएका सबैको रिपोर्ट नेगेटिभ आएको हो । शनिबार फेरि थप ३ जनाको स्वाब थ्रोट कोरोना परीक्षण गर्न पठाइएको डा. विकास साहले जानकारी दिए ।

डा. साहले लकडाउनका कारण धरानबासीलगायत एक नम्बर प्रदेशबासी सुरक्षित भएको भन्दै लकडाउनको कडाइका साथ पालना गरे कोरोनाको जोखिम न्यून हुने उनले बताए ।