नेपालमा फेला परेका कोरोना भाइरसका चौथो संक्रमित व्यक्तिसँगै आएका विराटनगरका एक युवा र उनको परिवारका सदस्यलाई क्वारेन्टाइनमा राखिएको छ ।

कैलालीको धनगढीका ३४ वर्षीय एक व्यक्ति चौथो संक्रमित भएको पुष्टि भई उपचाररत छन् । उनीसँगै दुबईबाट आएका विराटनगर–१५ का एक युवासहित उनको परिवारलाई क्वारेन्टाइनमा राखिएको हो ।

दुबईबाट दिल्ली हुँदै गत ७ चैतमा नेपाल आएका धनगढीका युवामा कोरोनाको संक्रमण देखिएपछि सँगै आएका विराटनगरका युवा र उनको परिवारलाई क्वारेन्टाइनमा राखिएको विराटनगर महानगरपालिकाको जनस्वास्थ्य महाशाखाका निरीक्षक दिलिपकुमार यादवले जानकारी दिए।

उनीसँगै परिवारका ३ सदस्यलाई विराटनगर–१९ वैजनाथपुरस्थित स्वास्थ्य केन्द्रको क्वारेन्टाइनमा राखिएको छ । दुबईबाट दिल्ली हुँदै आएका ती युवा काठमाडौंबाट बुद्ध एयरमा नेपालगञ्ज र बसमा धनगढी पुगेका थिए ।