मंगलबारदेखि लागु हुने गरी भारत सरकारले पनि २१ दिनको लागि लकडाउन गरेपछि बुधबार भारतबाट हुने आपूर्तिमा समस्या भएको छ । बुधबार एका बिहानै भारतबाट सामान आयात भए पनि दिउसो भने आयात निर्यातमा समस्या भएको भन्सार कार्यालयहरूले जनाएका छन् ।

दुबै नाका बन्द नभए पनि आयातमा भने समस्या देखिएको हो । भन्सार विभागका महानिर्देशक सुमन दाहालले भने बुधबार कम आपूर्ति भएपनि  नाका बन्द नभएको कारण समस्या नपर्ने बताए ।

भारत र नेपाल दुबै तर्फ लकडाउन भएपछि, मजदुर, ड्राइभर, भन्सार एजेन्टहरु आउन नसक्दा आयातमा समस्या भएको हो । बुधबार बिहान भैरहवा र कृष्णनगर नाकाबाट केही कन्टेनरहरु भने भित्रिएका थिए ।

बिहीबारदेखि नै सहज आपूर्तिको लागि दुई पक्षीय छलफल भने भएको भन्सार विभागले जनाएको छ । विभागका अनुसार २ हजार गाडीहरू अहिले बाटोमा रहेका छन् ।