विराटनगर, चैत ११–सरकारले लकडाउनको घोषणा गरेसँगै सहरका सडकहरु सुनसान जस्तै देखिएका छन् । सडकमा अत्यवश्यक बाहेकका सवारी साधन देखिदैनन् भने हिड्डुल गर्ने सर्वसाधारण समेत कमै देखिन्छन्।

धरानमा मंगलबार नेपाल प्रहरी र नगर प्रहरीले सर्वसाधारणलाई आवागमन गर्न रोकेका छन् । प्रहरीले धेरैलाई सम्झाएर फर्काएका छन् भने अत्यावश्यक काममा हिडेका मानिसलाई समेत भरसक नहिड्न सुझाव दिइरहेका छन् । लकडाउनका कारण बजार समेत बन्द भयो । बजारमा औषधी पसल, छिटफुट रुपमा किराना पसल खोलीएका छन् भने कही केही होटल समेत खुल्ला रहेका थिए ।

धरान प्रवेशको मुख्य नाका तीनकुनेमा प्रहरीले आवतजावतमा पूर्ण रुपमा रोक लगाएको छ । तीनकुनेबाट एम्बुलेन्स, दुध बोक्ने गाडी, सब्जी तथा तरकारी बोक्ने गाडी र स्वास्थ्य संस्था, वित्तिय संस्थाका कर्मचारी बाहेकलाई रोकिरहेको छ । सार्वजनिक सवारीलाई रोक लगाइएको छ भने बिरामी बोकेका गाडी र प्रेसलाई भने छुट छ ।