नेपालमा अहिले कोरोनाको संक्रमण नभए तापनि विश्‍वव्यापी रूपमा फैलिएको संक्रमणलाई मध्यनजर गरी सरकारले उच्च सतर्कता अपनाएको छ । विभिन्न चरणमा छुट्टाछुट्टै किसिमका सतर्कता देखाएको सरकारले शुक्रबार प्रधानमन्त्री केपी शर्मा ओलीले सम्बोधनपछि सबै नागरिकलाई सम्भव भएसम्म होम क्वारेन्टाइनमा बस्न आह्‍वान गरेको देखिन्छ ।

प्रधानमन्त्रीको सम्बोधनको क्रममा होम क्वारेन्टाइन शब्दको प्रयोग नभएता पनि अवलम्बन गर्न लगाइएका उपाय भने होम क्वारेन्टाइनमै राख्न खोजेको देखिन्छ । सरकारले अत्यावश्‍यक अवस्थाबाहेक सबै नागरिकलाई बाहिर ननिस्कन आह्‍वान गरेको छ । यसको अर्थ घरमै सुरक्षित ढंगले बस्नु भनेको हो ।

लामो दूरीका सवारी साधनलाई रोक लगाउने निर्णय लिइएको छ । यसको अर्थ अहिले बसेको स्थानबाट टाढा नजाऊ, हिड्डुलमा ध्यान देऊ भन्न खोजेको हो ।

सबै अन्तर्राष्ट्रिय उडानहरू कम्तिमा ९ दिनका लागि बन्द गरिएको छ । सरकारले अत्यावश्‍यकबाहेकका सेवा बन्द गर्ने निर्णय लिएको छ ।भाइरस संक्रमणको लक्षण १४ दिनसम्ममा देखिने भएकाले नागरिकहरूलाई आवश्‍यक सतर्कताका लागि सबै सेवा बन्द गरेर यो अवधिसम्म घरमै बस्न प्रोत्साहित गरिएको हो ।

विश्‍वव्यापी रूपमा फैलिएको संक्रमणबाट बच्न हामी सबैले आवश्‍यक उपाय अवलम्बन गर्न जरुरी छ । तर, हामीलाई अत्यावश्‍यक पर्ने बैंकिङ सेवा बन्द हुने छैन । खाद्य वस्तुको अभाव पनि नहुने विषयमा सरकारले पटक पटक विश्‍वस्त तुल्याएको छ । तसर्थ बढी मौज्दात राख्न जरुरी छैन् ।