काठमाडौं, फागुन १३–प्रमुख प्रतिपक्षी कांग्रेसका सांसद मीनेन्द्र रिजालले ५ वटा हेलिकप्टर लिएर प्रधानमन्त्रीले तामझामका साथ जन्मदिन मनाएको भन्दै आपत्ति जनाएका छन् । प्रतिनिधिसभाको मंगलबारको बैठकमा कांग्रेस सांसद रिजालले प्रधानमन्त्रीले ‘राजा महाराजा’ शैलीमा जन्मदिन मनाएको भन्दै आपत्ति जनाएका हुन् ।

’त्यो घरलाई पनि लाग्यो होला आफ्नो खड्गप्रसाद होइन, राजा महाराजा हो’, रिजालले भने, ‘त्यो घरको आत्माले तपाईंलाई चिनेन होला । त्यो घरको अगाडि उभिएर जनता कुन लोकमा र तपाईं कुन लोकमा हुनुहुन्छ भन्ने सोच्नुभयो ?’ प्रधानमन्त्रीले ४ हजारलाई साडी र कोट बाँडेको कुरा बाहिर आएको विषयप्रति पनि सांसद रिजालले चासो राखे ।

उनले भ्रष्टाचार र अनियमितताका विषयमा संसद्लाई जवाफ दिन सभामुखमार्फत प्रधानमन्त्रीसँग माग गरे । ‘कम्युनिस्ट सरकारका कामलाई देखेर जनता आक्रोशित बनेका छन्’, उनले भने, ‘अब सदनमा आउनुस् र आश्वस्त बनाउनुस् भ्रष्टाचार गर्न दिन्न भनेर, तपाईं संसद्ले छानेको प्रधानमन्त्री हो ।’