पोखरा, फागुन ११–पोखरामा ‘प्याराग्लाइडिङ वर्ल्ड कप एशियन टुर- २०२०’ तथा ‘१९औँ नेपाल ओपन प्याराग्लाइडिङ च्याम्पियनशीप’ आइतबारबाट सुरु भएको छ । नेपाल हवाई खेलकुद संस्था (ना)को आयोजना तथा नेपाल प्याराग्लाइडिङ तथा प्याङग्लाइडिङ संघ (नेफा) र नेपाल पाइलट क्लबको सहकार्यमा प्रतियोगिता आयोजना भएको हो ।

प्रतियोगितामा १९ देशका ८९ जना खेलाडीको सहभागिता रहेको नाका अध्यक्ष कृष्ण भण्डारीले जानकारी दिए । उनका अनुसार फ्रान्स, बेल्जियम, रसिया, काजकस्तान, अमेरिका, जापान, दक्षिण कोरिया, इण्डोनेसिया, इरान, स्विट्जरल्याण्ड, भारत, बंगलादेश, जर्मनीलगायत १९ देशका खेलाडीहरु प्रतिस्पर्धामा उत्रिएका छन् । प्रतियोगिताको प्रवर्द्धन नेपाल पर्यटन बोर्डले गरेको छ ।

दिएको टास्क सबैभन्दा छोटो समयमा पूरा गर्ने खेलाडी प्रतिस्पर्धामा छनोट हुनेछ । प्रतियोगितामा ओभरल च्याम्पियन, महिला च्याम्पियन, नेपाली च्याम्पियनतर्फ पहिलोदेखि पाचौँ स्थान सम्मका विजेतालाई मेडल र प्रमाणपत्र प्रदान गरिनेछ । प्रतियोगिता फागुन १७ गतेसम्म चल्नेछ ।