भोजपुर, फागुन ९–भोजपुर सदरमुकाममा रहेको शहीद पार्क संरक्षणविहीन अवस्थामा पुगेको छ । विगतमा जिल्ला विकास समितिको संरक्षणमा रहेको सो पार्क अहिले आएर जिल्ला समन्वय समितिमातहतमा रहेको छ ।

सदरमुकामभित्र रहेर पनि पार्कको उचित व्यवस्थापन हुन नसक्दा पार्क व्यवस्थित हुन नसकेको हो । मुलुक परिवर्तनका लागि लडेका राजनीतिक योद्धाहरु रामप्रसाद राई, नारदमणि थुलुङलगायतको शालिक राखेर निर्माण गरिएको पार्कको अहिले केही कार्यक्रम गरिँदा मात्र सरसफाइ हुने गरेको छ ।

प्रजातन्त्र दिवस, शहीद दिवस, गणतन्त्र दिवस, संविधान दिवसजस्ता अवसरमा पार्कमा राखिएका योद्धाहरुको सालिकमा माल्यापर्ण गरिन्छ । तर, अन्य समयमा भने पार्कको सरसफाइ हुने गरेको छैन । जिल्ला विकास समिति हुँदा बजेट पनि हुने तर अहिले समन्वय समितिमातहत रहँदा बजेटसमेत नआउने भएकाले यसको उचित व्यवस्थापनमा समस्या भएको जिल्ला समन्वय समितिले जनाएको छ ।