काठमाडौं, फागुन ७–त्रिभुवन विश्वविद्यालयले यस वर्ष हुने भनेको स्वतन्त्र विद्यार्थी युनियनको निर्वाचन स्थागित गरेकोमा नेपाल विद्यार्थी संघ (नेविसंघ) ले आपत्ति जनाएको छ । नेविसंघका महामन्त्री बलदेव तिम्सिनाले त्रिभुवन विश्वविद्यालयले विद्यार्थी संगठनको सहमतिविना नै विशेष कारण देखाउँदै अर्को निर्णय नभएसम्मका लागि स्ववियु निर्वाचन स्थगित गरेर स्ववियुको अस्तित्वमाथि नै घात र्पुयाउन खोजेको आरोप लगाए ।

प्रमुख प्रतिपक्षी दल नेपाली कांग्रेसको भ्रातृ संस्था नेविसंघले सरकार र त्रिभुवन विश्वविद्यालयको षड्यन्त्रपूर्ण तवरले स्ववियू निर्वाचन स्थगित गरेको आरोप लगाउँदै विद्यार्थी आन्दोलन ऐतिहासिक उपलब्धि स्ववियुलाई जोगाउने पक्षमा रहेको जनाएको छ ।

लोकतन्त्रका आधारभूत मूल्यमान्यतामाथि हस्तक्षेप गर्दै आएको वर्तमान सरकार र त्रिविविको स्वार्थ नमिलेका कारण सत्तारुढनिकट विद्यार्थी संगठनको सम्भावित पराजयबाट भाग्न स्ववियु निर्वाचन स्थगित गरिएको तिम्सिनाले आरोप लगाए । त्रिविविको यस्तो षडयन्त्रपूर्वक स्ववियु निर्वाचन स्थगित गर्ने हर्कतका विरुद्ध एकजुट हुन नेविसंघले आह्वान गरेको छ ।