विराटनगर, फागुन ६–संखुवासभाको चैनपुर १ स्थित गुफापोखरीबाट नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) का जिल्ला सदस्यसहित ५ जनालाई प्रहरीले पक्राउ गरेको छ । पक्राउ पर्नेमा चैनपुर– ४, दोभानेका अग्नि भन्ने सन्तोष तामाङसहित ५ जना रहेको प्रहरीले जनाएको छ ।

उनीहरूको साथबाट विस्फोटक पदार्थसमेत बरामद भएको छ । संखुवासभाका विभिन्न स्थानमा आगजनी र बम विस्फोट गरिरहेकाको खोजी गर्ने क्रममा उनीहरूलाई गुफापोखरीबाट जोरपाटी जाने सडक खण्डमा शंकास्पद रूपमा हिँडिरहेको अवस्थामा पक्राउ गरिएको प्रहरीले जनाएको छ ।

उनीहरूलाई प्रहरीको गस्ती टोलीले बमसहित पक्राउ गरेको प्रदेश प्रहरी कार्यालय विराटनगरले जनाएको छ । पक्राउ परेकाहरूको साथबाट रेडबुल बम, सकेट बम, विस्फोटनमा प्रयोग हुने सेफ्टी फ्युजलगायत कागजातसमेत बरामद गरिएको प्रहरीले बताएको छ । पक्राउ परेकामाथि थप अनुसन्धान भइरहेको प्रहरीले जनाएको छ ।