विराटनगर, फागुन ३–विराटनगरस्थित कोशी राजमार्गमा आज बिहान भएको टिपरले मोटरसाइकललाई ठक्कर दिँदा २ विद्यार्थीको मृत्यु र एक जना गम्भीर घाइते भएका छन् । प्रहरीका अनुसार बुढीगंगा गाउँपालिकाको वडा नम्बर १ तथा विराटनगर प्रवेशद्वारनजिकैको कोशी राजमार्गमा टिपरले मोटरसाइकललाई ठक्कर दिँदा सो दुर्घटना भएको हो ।

मृत्यु हुनेमा मोटरसाइकलचालक सिरहाका २० वर्षीय हरेराम साह र सिरहाकै लहानका २१ वर्षीय मोहम्मद ओजिर रहेको प्रहरीले जनाएको छ । त्यसैगरी, सोही मोटरसाइलमा सवार अर्का सप्तरीको रुपनीका १९ वर्षीय धनराज यादव गम्भीर घाइते भएको र उनको विराटनगरस्थित कोशी अस्पतालमा उपचार भइरहेको प्रहरीले जनाएको छ । तीन जना सवार रहेका प्रदेश २–०१ प १६०८ नम्बरको मोटरसाइकललाई विराटनगरबाट इटहरीतर्फ जाँदै गरेको को १ ख ७३०९ नम्बरको टिपरले विराटनगर गेटनजिकैको सडकमा ठक्कर दिएको थियो ।

ठक्करबाट घाइते भएका २ जनालाई कोशी अस्पताल ल्याउँदा ल्याउँदै बाटोमा मृत्यु भएको प्रहरीले जनाएको छ । टिपरचालक ग्रामथान गाँउपालिका– ७ का ३५ वर्षीय शशिकुमार थान्दारलाई प्रहरीले नियन्त्रणमा लिएको छ । दुर्घटनामा मृत्यु भएकाहरु गोल्डेन पार्क कलेज विराटनगरमा अध्ययनरत विद्यार्थी रहेको प्रहरीले जनाएको छ ।