विराटनगर, माघ २६–प्रमुख प्रतिपक्षी दल नेपाली कांग्रेसले प्रदेश १ को प्रदेशसभा बैठक पनि अबरुद्ध गरेको छ । आजको बैठक सुरु भए लगत्तै नेपाली कांग्रेसका सांसद उठेर बैठक अवरुद्ध गरेका थिए । प्रतिपक्षका सांसद उठेर विरोध जनाएपछि सभामुख प्रदीपकुमार भण्डारीले वस्न अनुरोध गरेका थिए ।

सभामुखले पटक पटक बस्न अनुरोध गरेपनि कांग्रेसका सांसदहरुले बस्न अटेर गरेपछि सभामुख भण्डारीले आफ्ना असन्तुष्टी बैठकमा राख्न प्रमुख प्रतिपक्षी दलका सचेतक सुयर्माराज राईलाई बोल्न समय दिएका थिए । संसदमा बोल्दै सचेतक राईले ललिता निवास प्रकरणमा नेकपाको संघिय सरकारले पक्षपात पूर्ण व्यवहार गरेको आरोप लगाए ।

नेकपाको सरकारले ललिता निवास प्रकरणमा आफ्ना नेता तथा कार्यकर्तालाई उन्मिुक्ति दिने प्रयास गरेका कारण आन्दोलनमा उत्रनुपरेको उनले बताए । ‘एक पक्षिय ढंगले सरकारले हाम्रो नेता माथि मात्र मुद्धा चलाएको छ ।’ उनले भने,‘पूर्वप्रधानमन्त्री माधबकुमार नेपाल, बाबुराम भट्टराई, पूर्वमुख्यसचिव लिलामणी पौडेल, नेकपाका नेता विष्णु पौडेलका छोरा नविन पौडेललाई पनि मुद्धा चलाउनु पर्छ ।’

सरकारले दोषीहरुसवैलाई कानुनी दायरामा नल्याउन्जेल सम्म संसदबैठक अबरुद्ध गरिरहने कांग्रेस संसदीय दलको निर्णय भएको राईले बताए । प्रमुख प्रतिपक्षीदलको तर्फबाट सचेतक राईले भनाई राखिसके पछि पुनः कांग्रेसका सांसदले उभिएर संसद अबरुद्ध पारेका थिए । सभामुख भण्डारीले सचेतकले आफ्ना कुरा राखिसकेका कारण बस्न आग्रह गरेका थिए । तर, कांग्रेसका सांसदले उभिएर बिरोध जनाईरहेपछि सभामुख भण्डारीले भोलि दिउँसो २ बजेसम्मका लागि बैठक स्थगित भएको जानकारी गराए ।