बालश्रममा प्रयोग गरिएका ५ बालकको उद्धार - News Birat

बालश्रममा प्रयोग गरिएका ५ बालकको उद्धार

न्यूज विराट

विराटनगर, माघ १७–विराटनगरबाट नियमविपरीत बालश्रममा प्रयोग गरिएका ५ जना बालकलाई शुक्रबार उद्धार गरिएको छ । विराटनगर महानगरपालिकाको नेतृत्वमा निस्किएको सरोकारवालाको टोलीले नगरक्षेत्रका विभिन्न होटलहरूबाट ती बालकलाई उद्धार गरेको हो । सो क्रममा नगरक्षेत्रको वडा नम्बर ७ बाट ४ जना र वडानम्बर ३ बाट १ जनालाई उद्धार गरिएको महानगरपालिकाले जनाएको छ ।

महानगरपालिकाका नगर शिक्षा अधिकारी दुर्गा खतिवडा, महिला तथा बालबालिका शाखा प्रमुख डिल्ली धिमाल, सिबिन बाल हेल्पलाइनका वासु अधिकारी, जिल्ला प्रहरी कार्यालय र नगर रक्षकहरूको संयुक्त टोलीले नगरक्षेत्रका विभिन्न होटलहरूमा काम गर्दागर्दैको अवस्थामा बाल श्रमिकहरूलाई उद्धार गरेको हो ।

उद्धार गरिएका बाल श्रमिकहरूलाई तत्कालका लागि सिबिनको संरक्षणमा राखिएको महानगरपालिकाका महिला तथा बालबालिका शाखा प्रमुख धिमालले बताए । उनले बालश्रम प्रयोग नगर्न निरन्तर माइकिङ गर्ने र होटल तथा सार्वजनिक स्थानमा स्टिकर टाँसेर अनुरोध गरिए पनि अटेर गरिएका कारण सरोकारवालाको टोलीले छड्के गर्न थालेको जानकारी दिए । बालश्रम प्रयोग गर्नेहरूलाई सचेत गराउनुका साथै नियमानुसारको कारबाही हुने महानगरपालिकाले जनाएको छ । उद्धार गरिएका सबै बालकको उमेर १५ वर्ष मुनि रहेको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles