विराटनगर, माघ १०=मोरङका विभिन्न स्थानमा चीनका राष्ट्रपति सि जिनपिङकाबारे लेखिएको पुस्तक वितरण गरिएको छ । चीनको अर्थिक समृद्धिका लागि जिनपिङको सोच र उनले अघि सारेका योजनालगायतका विषय समेटेर प्रकाशित भएको पुस्तक जिल्लाका विभिन्न स्थानीय तह, क्लब तथा सामुदायीक विद्यालयहरुमा वितरण गरिएको हो । मोरङको रतुवामाई नगरपालिकामा पनि उक्त पुस्तकबारे चर्चा गर्दै सहभागिलाई वितरण गरिएको छ ।
मनमोहन स्पोर्टस् एकेडेमिको आयोजनामा रतुवामाई नगरपालिका, विभिन्न सामुदायीयक विद्यालय र क्लबहरुमा जिनपिङबारेको उक्त पुस्तक वितरण गरिनुका साथै चर्चासमेत गरिएको हो । नेकपा मोरङका सदस्य तथा रतुवामाई नगर कमिटि अध्यक्ष शिवनारायण राजवंशी र जिल्ला कमिटी सदस्य दुर्गा विष्टले जिनपिङवारे लेखिएको उक्त पुस्तकबारे चर्चा गर्दै वितरण गरेका हुन् ।
सिले ल्याएको आर्थिक समृद्धि र विकासका योजनालाई कसरी नेपालमा लागू गर्दा देशको विकास गर्न सकिन्छ भन्ने धारणाका साथ पुस्तक वितरण गर्नुका साथै चर्चा गरिएको होे । सरकारले नेपालमा भएका पर्याप्त स्रोत साधन र जनशक्तिको प्रयोग गरेर सिको सिद्धान्त र अवधारणा लागु गर्न सके नेपाल पनि एउटा समृद्ध राष्ट्र बन्न सक्ने कार्यक्रममा चर्चा गरिएको थियो ।
कार्यक्रममा विभिन्न राजनितिक दलका नेता तथा कार्यकर्ता, विद्यार्थी, शिक्षक, अभिभावकलगायत स्थानीयवासीको उपस्थिति रहेको थियो । त्यस्तै मोरङको सुन्दरहरैंचा–६ मा पनि इस्ट नेपाल टेक्निकल कलेजको आयोजनामा जिनपिङले राष्ट्रमा गरेको अर्थिक समृद्धिका साथै उल्लेखनीय विकास र योगदानलाई समेटेर तयार पारिएको उक्त पुस्तक वितरण गरिएको छ ।
त्यसैगरी प्रदेश नं. १ को राजधानी विराटनगरमा बिहिबार सम्पन्न राष्ट्रियसभा निर्वाचनमा मतदान गर्न आएका प्रदेशसभा सदस्य, १ सय ३७ वटै स्थानीय तहका प्रमुख र उपप्रमुख, विभिन्न दलका नेता कार्यकर्ता सवैलाई सो पुस्तक वितरण गरिएको छ । पुस्तक लिँदै उदयपुरको त्रियुगा नगरपालिकाका मेयर बलदेव चौधरीले आर्थिक विकासमा जिनपिङका बिचार लागु गर्न सके मुलुकले काँचुली फेर्न समय नलाग्ने बताए ।
