एजेन्सी, माघ १–पुणेंकी यरवदा जेलमा रेणुका सिंदे र सीमा गावित विगत २४ वर्षदेखि बन्दी छन् । यी दुवै महिला दिदीबहिनी हुन् । दुवै महिलामाथि ४२ बच्चाको हत्याको आरोप छ । रेकर्डअनुसार यी दुवैका साथमा आमा अन्जना गावित पनि दोषी पाइएकी थिइन् । एक बिरामीका कारण उनको मृत्यु भइसकेको छ । यी तीन आमा छोरीले १९९० देखि १९९६ सम्म पुणें र त्यस आसपासका शहरबाट कुल ४२ बच्चा अपहरण गरी उनीहरूको वीभत्स हत्या गरेको बताइएको छ । यो मामला सार्वजनिक भएपछि महाराष्ट्रका अखबारले लेखेका थिए कि ‘स्वतन्त्र भारतमा यस घटनाअघि यस्तो कुनै नरसंहार भएको थिएन । जब केही सीमित व्यक्तिको समूहले यति धेरै बच्चाको हत्या गरिएको छ ।’

४२ बच्चा अपहरण र उनीहरुको हत्या घटनाबारे अनुसन्धान गर्न राज्य सरकारले सीआईडी गठन गरेको थियो । यद्यपि यो टिमले पनि यी महिलाहरूमाथि अनुसन्धानका क्रममा १६ अपहरण र ६ हत्या मात्रै पुष्टि गर्न सकेको थियो । बाँकी हत्याबारे कुनै प्रमाण जुटाउन सकेन । अन्जना गावित मुख्य रूपमा नासिकमा बस्दै आएको बताइन्छ । एक ट्रक ड्राइभरसँग उनको प्रेम थियो । पछि उनले भागेर विवाह गरिन् । अन्जनाको पहिलो सन्तान रेणुका थिइन् । त्यसपछि उनका पतिले उनलाई छोडिदिए । पतिले छाडेपछि अन्जनाको अवस्था सडकमा पुगेको थियो । पछि उनले एक अवकाश सैनिक मोहन गावितसँग विवाह गरिन् ।

गावितबाट दोस्री छोरी सीमाको जन्म भयो । सीमा जन्मेको केही समयपछि नै मोहनले अन्जनालाई पनि छाडिदिए । स्थानीयका अनुसार आफू र छोरीहरूको पेट पाल्नका लागि चोरी गर्न सुरु गरेकी थिइन् । सञ्चारमाध्यमका अनुसार १९९० मा रेणुका पुणेंको एक मन्दिरमा चोरी गर्दै गरेको अवस्थामा पक्राउ परिन् । रेणुकाको साथमा त्यसबेला नवजात शिशु पनि थियो । बच्चाको आडमा रेणुका भीडबाट सहानुभूति प्राप्त गर्दै त्यहाँबाट बच्न सफल भइन् । त्यसपछि नै उनको दिमागमा बच्चा चोरी गर्ने सोच पलाएको थियो । त्यसबेला रेणुकाको साथमा रहेको बच्चा उनको आफ्नै थियो कि अरु कसैको हो भन्ने हालसम्म पत्ता लागेको छैन ।

मन्दिर चोरी घटनापछि नै तीनै आमा छोरीले बच्चा चोरी गर्ने निर्णय गरे । बच्चाको साथमा चोरी गर्दैगर्दा पक्राउ परेको बेला बच्चा पाल्न चोरी गर्न बाध्य भएको भन्दै बच्न सफल हुन्थिन् । यति मात्र होइन, उनीहरू बच्चालाई सडक तथा गल्लीमा पठाएर भीख माग्न लगाउँथिन् । जब बच्चा ठूला हुँदै गए तब आफूले भनेको नमान्ने बच्चालाई कुटपिट गर्दै हत्या गर्थिन् । रेणुकाकी बहिनी सीमाले एक पटक सात महिनाको बच्चा जमिनमा पछारेरै हत्या गरेकी थिइन् । भोकाएको बच्चाले रुन नछोडेपछि रुन बन्द गराउन भुइँमा पछारेर हत्या गरेको मिडिया रिपोर्टमा उल्लेख छ । पहिलो पटक भित्तामा मिल्काइन् अनि भुइँमा पटक–पटक पछार्दै ज्यान लिइन् । त्यसपछि टुक्रा–टुक्रा भएको शरीर बोरामा हालेर सिनेमा हलमा फिल्म हेर्न गएकी थिइन् ।

प्रहरीले १९९६ मा पक्राउ गरेपछि प्रहरी समक्ष उनले दिएको बयानबाट स्वयम् प्रहरी नै हैरानमा परेका थिए । अदालतमा यी दुवै बहिनीले वकिलसमक्ष आफ्नी आमालाई मुख्य योजनाकार भएको बताएका थिए । २९ जून २००१ मा सेशन कोर्टले रेणुका सिंदे र सीमा गावितलाई १४ बच्चा अपहरण गरी ६ को हत्या अभियोगमा फाँसीको सजाय सुनायो । त्यसपछि दुवै महिलाले हाई कोर्टमा बचावका लागि अपिल गरे । ३१ अगस्ट २००६ मा हाइकोर्टले दुवै सिरियल किलर बहिनीलाई फाँसीको सजाय सदर गरेको थियो ।

पछि सुप्रिम कोर्टले पनि दुवै महिलालाई फाँसीको सजाय सदर गरेको थियो । फाँसीबाट बचाउन राष्ट्रपतिसमक्ष पनि अपिल गरेका थिए । तर पूर्व राष्ट्रपतिले उनीहरुको अपराध क्षमायोग्य नभएको भन्दै अस्वीकार गरिदिएका थिए । हाल उनीहरू फाँसीको मिति कुरेर जेलमै बसेका छन् ।