काठमाडौं, पुस २४–नेपाली कांग्रेसका सभापति शेरबहादुर देउवाले पार्टीको महाधिवेशनको मिति अघि सार्न नसकिने बताएका छन् ।असन्तुष्ट जिल्ला सभापतिहरुलाई आफ्नै निवासमा सम्बोधन गर्दै सभापति देउवाले महाधिवेशनका लागि तोकिएको २०७७ साल फागुनको मिति सार्न नसकिने स्पष्ट पारेका हुन् । उनले बहुमतबाट निर्णय लिएका भ्रातृ संगठन, विभाग र विधानका धारा निलम्बनका विषयमा भने असन्तुष्ट रामचन्द्र पौडेल पक्षसँग छलफल गर्ने प्रतिवद्धता जनाए ।
सम्बोधनका क्रममा देउवाले असन्तुष्ट जिल्ला सभापतिहरुको भेलाप्रति समेत प्रश्न उठाएका छन् । उनले आफूले गरेका सबै निर्णयबाट पछि हट्न नसक्ने र त्यसो गरेमा पार्टी बलियो नबन्ने उल्लेख गरेका छन् । उनको भनाइ उद्धृृत गर्दै एक जिल्ला सभापतिले भने, ‘म निर्वाचित सभापति हुँ, मैले आफूले गरेका निर्णयलाई नै मान्न छाड्ने हो भने पार्टी कसरी चल्छ ? तपाईहरु पनि जिल्लामा निर्वाचीत सभापति हो, तपाईंहरूका निर्णयविरुद्ध पनि यसरी नै पराजित भएका उम्मेदवारहरूले भेला गरे भने के गर्नुहुन्छ ?’
जिल्ला सभापतिहरूले अहसहमतिबीच निर्णय गरिएको, विधानका धारा निलम्बन गरिएको भन्दै वरिष्ठ नेता र महामन्त्रीले नै छलफल गरेको बताएका थिए । उनीहरूले भ्रातृ संस्थाहरूले समेत पार्टी सदस्यता वितरण गर्न सक्ने व्यवस्था गरिएकोप्रति गम्भीर आपत्ति जनाएका छन् । आफ्नो संगठनमा सदस्यता वितरण गरेर महाधिवेशन गर्न नसक्ने भ्रातृ संस्थालाई पार्टी सदस्यता वितरण गर्न जिम्मा दिन नहुने उनीहरूको तर्क थियो । जिल्ला सभापतिहरूले आफूहरूका असन्तुष्टिका विषयमा सभापति देउवाको जवाफ माग्ने र स्पष्ट जवाफ नआएमा थप निर्णय गर्ने भेलाको नेतृत्व गरेका काभ्रेका सभापति मधु आचार्यले जानकारी दिए ।
