विराटनगर । कटहरी गाउँपालिकाले ४० जना बेरोजगार युवायुवतीलाई लक्षित गरेर सिपमुलक तालिम संचालन गर्ने भएको छ । सरोकारवाला निकायसंगको समन्वयमा संचालन गरिने तालिमको बिषयमा गाउँपालिकाले सुझाव समेत संकलन गरेको छ । युवाहरुलाई दिने १० महिने तालिमका बिषयमा अन्तरक्रिया कार्यक्रमगरि सुझाव संकलन गरिएको हो ।

गाउँपालिकाले तालिम प्रदायक संस्था,रोजगारदाता,विभिन्न विद्यालयका प्रधानाध्यापक र कार्यपालिकाका पदाधिकारीलाई सहभागी गराएर सुझाव संकलन गरेको हो । अन्तरक्रियाका सहभागिले स्थानीय श्रम बजारको माग अनुसार बेरोजगार युवाहरुलाई तालिम दिन सुझाव दिएको कटहरी गाउँपालिकाका शिक्षा शाखा प्रमुख द्रोण प्रसाद पोखरेलले बताए । सहभागिले युवाहरुलाई प्रोफेश्नल हाउस वायरिङ,प्लम्बर,कुक र टेलिकम लाईन म्यान लगायतका बिषयमा तालिम संचालनगर्न सुझाव दिएको उनले बताए । अन्तरक्रियाबाट संकलित सुझाव कार्यपालिका बैठकमा राखेर बिषय छनौट सम्बन्धि निर्णय लिएर तालिम संचालन गरिने कटहरी गाउँपालिकाका प्रमुख प्रशासकिय अधिकृत मनोज कुमार साहले बताए ।

बेरोजगार युवाहरुकालागि कार्यगत अभ्यास सहितको १० महिने तालिम संचालन गरिने साहले बताए । गाउँपालिकाका अध्यक्ष देवराज चौधरीले कटहरीले बेरोजगार युवाहरुलाई स्वरोजगार तथा रोजगार बनाउन विभिन्न प्रकारका तालिम र कक्षाहरु संचालन गर्दै आएको बताए । उनले यस अघि देखीपनि ४० जना युवाहरुलाई सहभागि गराएर कम्प्युटर सम्बन्धि लभेल टू को कक्षा समेत संचालनमा रहेको जानकारी दिए । गाउँपालिकाले दिगो तथा सम्मानित रोजगारीकालागि सीप (ईन्स्योर) परियोजना र एक्सपर्ट टेक्निकल कलेज सहित हेल्भाटास नेपालकोे प्राबिधिक सहयोगमा तालिम संचालन गरिने जनाईएको छ ।