विराटनगर । ग्रामीण विकास लघुवित्त वित्तीय संस्था लिमिटेडले आफ्नो दशौं वार्षिकोत्सव विभिन्न प्रदेशहरुमा उल्लासपूर्ण वातावरणमा सम्पन्न गरेको छ। श्रावण ३० गते पाँचवटा विकास क्षेत्रका ग्रामीण विकास बैंकहरु एकीकृत भई स्थापना भएको यस संस्थाले आफ्नो स्थापना दिवसको अवसरमा विशेष कार्यक्रमहरुको आयोजना गरी मनाएको हो ।

संस्थाको बिराटनगर स्थित संचालन तथा सुपरिवेक्षण कार्यालयले आफ्नो कार्यक्षेत्र अन्तर्गतका ४२ वटा शाखा कार्यालयहरुबाट छनोट गरिएका ४८ जना उत्कृष्ट महिला सदस्यहरुलाई जनही दश हजार रुपैयाँको दरले नगद पुरस्कार तथा सम्मानपत्र प्रदान गर्‍यो। कार्यक्रममा सहभागी सदस्यहरुलाई दूरी अनुसार एक हजार देखि पाँच हजार सम्म यातायात तथा खाना खर्च पनि उपलब्ध गराइएको थियो।

झापा, मोरङ्ग, सुनसरी, सिराहा, सप्तरी र उदयपुरका विभिन्न स्थानबाट आएका सदस्य तथा अभिभावकहरुलाई बरगाछी स्थित कञ्चनजङ्घा ब्याङ्केटमा वित्तीय साक्षरता सम्बन्धी प्रशिक्षण दिइएको थियो। प्रशिक्षकद्वय मोतिराम अधिकारी र कुमार बहादुर सिंहले यस विषयमा विशेष कक्षा सञ्चालन गरेका थिए।
वार्षिकोत्सवकै अवसरमा संस्थामा २५ वर्ष अनवरत सेवा पुर्‍याएका ६४ जना कर्मचारीहरुलाई दीर्घ सेवा पदक र कदरपत्रद्वारा सम्मानित गरिएको थियो।
कार्यक्रमको अध्यक्षता संचालन तथा सुपरिवेक्षण कार्यालय प्रमुख कुमार बहादुर सिंहले गरेका थिए भने प्रमुख अतिथिको रूपमा विभागीय प्रमुख मोतिराम अधिकारी उपस्थित थिए। प्रबन्धक गोविन्द प्रसाद ढुङ्गेलले स्वागत मन्तव्य दिएका थिए र कार्यक्रम संचालन सहायक अधिकृत युवराज भट्टराईले गरेका थिए।
यस कार्यक्रमले ग्रामीण क्षेत्रमा वित्तीय पहुँच विस्तार गर्दै महिला सशक्तीकरणमा योगदान पुर्‍याउने संस्थाको प्रतिबद्धता झल्काएको छ।