विराटनगर । विराटनगर – ३ मा रहेको पोखरीया माविको कक्षा १२ को परीक्षामा ७५.४५ प्रतिशत विद्यार्थी उत्तिर्ण भएका छन् ।

राष्ट्रिय परीक्षा बोर्डले शुक्रबार सार्वजानिक गरेको नतिजा अनुसार पोखरीयाबाट ३ सय ३३ जना विद्यार्थीले दिएको परीक्षामा २४९ जना विद्यार्थीले ग्रेड प्राप्त गर्न सफल भए अर्थात् उत्तीर्ण भएका छन्। जसमध्ये ३.६ जीपीए भन्दा माथि ल्याउने ११ जना, ३.२ जीपीए देखि ३.६ जीपीएसम्म ल्याउने ७३ जना, २.८ देखि ३.२ जीपीएसम्म ल्याउने ८८ जना, २.४ देखि २.८ जीपीए सम्म ल्याउने ६८ जना, २.जीपीए देखि २.४ जीपीएसम्म ल्याउने ९ जना विद्यार्थी रहेको स्कुलका प्रधानध्यापक खेमराज भट्टराईले जानकारी दिए । ८४ जना विद्यार्थी एनजी भएका छन् ।

पोखरीया मावि सामुदायिक विद्यालय हो । गुणस्तरीय शिक्षा प्रदान गरेर पोखरीया स्कुल नमूना विद्यालयको रुपमा कहलिएको छ । यस विद्यालयमा विद्यार्थी भर्ना हुनको लागि प्रवेश परीक्षा लिने गरेको छ । प्रवेश परीक्षामा उत्तिर्ण हुने विद्यार्थी मात्रै पोखरीयामा भर्ना हुने गर्दछन् । कक्षा १२ सम्म पढाइ हुने उक्त विद्यालयमा अंग्रेजी माध्यमबाट पनि पढाइ हुने गरेको छ । कक्षा १२ सम्म पढाइ हुने उक्त विद्यालयमा कक्षा ११ र १२ मा विज्ञान , व्यवस्थापन र शिक्षा विषय पढाइ हुने गरेको छ ।