विराटनगर । चालु आर्थिक वर्षको सात महिनामा मोरङबाट १३ हजार भन्दा बढी वैदेशिक रोजगारमा गएका मध्ये १५ जनाको मृत्यु भएको पाइएको छ । मृत्यु भएको मध्ये ११ जना पुरुष र ४ जना महिला रहेका छन् ।

सुरक्षित आप्रवासन (सामी) ले बुधबार विराटनगरमा आयोजना गरेको पत्रकार सँगको अन्तरक्रिया कार्यक्रममा दिएको जानकारी अनुसार वैदेशिक रोजगारमा जाने क्रममा मृत्यु हुने सबैभन्दा बढी उर्लाबारीको रहेको छ । मोरङमा १५ जनाको मृत्यु भएको मध्ये ८ जना उर्लाबारीको रहेको कार्यक्रम अधिकृत डि.एन. चौधरीले जानकारी दिए । मोरङमा १ हजार ४ सय ७७ घर धुरिबाट १३ हजार ८ सय १३ जना महिला र पुरुष वैदेशिक रोजगारीमा गएको चौधरीले बताए ।

श्रीमान–श्रीमती वैदेशिक रोजगारमा गएपछि दोस्रो विवाह गर्ने क्रम पनि बढेको पाइएको छ । मोरङमा ८ हजार ४ सय ३६ जना पुरुष वैदेशिक रोजगारमा जाँदा ३२ जना महिलाले दोस्रो विवाह गरेका छन् । यसैगरी १ हजार ५ सय ४४ महिला वैदेशिक रोजगारमा जाँदा १७८ जना पुरुषले दोस्रो विवाह गरेको पाइएको हो ।

सुरक्षित आप्रवासन (सामी) का कार्यक्रमका अध्यक्ष केशर बस्नेतले रोजगारीको अभावमा घर जग्गा बिक्री गरेर मोरङबाट विदेश जानेको संख्या बढि रहेकोले राज्यको ध्यान जान जरुरी रहेको बताए । मोरङबाट विदेश गएकाहरूले बिचमा नेपाल फर्केर घर जग्गा बिक्री गर्दै पुनः विदेशमै गएर घर जग्गा खरीद गरेर बसोवास गर्ने क्रम बढि रहेको बताए । कार्यक्रममा विराटनगर महानगरपालिकाका निमित्त प्रमुख प्रशासकीय अधिकृत दिपक पौडलले देशमै रोजगारी उपलब्ध गराउने गरी विराटनगर महानगरपालिकाले सिम मूलक कार्यक्रम सञ्चालन गरिरहेको बताए ।
सुरक्षित आप्रवासन (सामी) ले मोरङको विराटनगर महानगरपालिका उर्लाबारी नगरपालिका, रंगेली नगरपालिका र कानेपोखरी गाउँपालिका गरी ४ स्थानीय तहमा वैदेशिक रोजगारमा गएका घरधुरीदेखि परिवारको संख्याको बारेमा जानकारी संकलन गर्ने गरेका छन् ।