विराटनगर । बायाँ खुट्टमा क्यान्सर भएका एक जना क्यान्सर पीडित विरामीले उपचारका लागि सहयोग गरिदिन परिवारले आग्रह गरेको छ । सुनसरीको दुहबी नगरपालिका – १० का २० वर्षीय नरेश कुमार साहका परिवारले उपचारको लागि सहयोगको याचना गरेका हुन् ।

साहको बाँया खुट्टाको घुडामा कन्यासर भएको छ । क्यान्सर भएपछि उनको उपचार भरतपुर क्यान्सर अस्पतालमा भइरहेको छ । उपचार गर्दा उनको परिवारको ८ लाख रुपैयाँ सकिएको छ । खुट्टाको शल्यक्रिया गर्न थप आठ लाख रुपैयाँ लाग्ने अस्पतालले बताएको छ । आर्थिक विपन्न परिवारका साह परिवारसँग भएको पैसाँ छोराको उपचारमा सकिएपछि थप उपचारको लागि आर्थिक अभाव भएको बावु विरेन्द्र कुमार साहले बताए । ‘छोराको उपचारमा ८ लाख रुपैयाँ सकियो । दुई कठ्ठा खेतीयोग्य जमिन बेचे । त्यसले नपुगेपछि आफन्त र छरछिमेकसँग ऋणपान गरेर आफुले भ्याएसम्म उपचार गरे । अब शल्यक्रिया गरिनुपर्ने चिकित्सकले सुझाब दिएका छन् । त्यसको लागि थप आठ लाख रुपैयाँ लाग्ने अस्पतालले भनेको छ,’ बावु विरेन्द्रले भने, ‘अहिलेसम्म ६ लाख रुपैयाँ सहयोग प्राप्त भयो । मनकारी व्यक्ति र संघसंस्थाहरुबाट सहयोग पनि जुटयो । अब दुई लाख रुपैयाँ जम्मा गर्न सकिए छोराको शल्यक्रिया हुने थियो ।’ थप दुई लाख रुपैयाँ अभावको कारणले अहिले छोराको उपचार हुन रोकिएको उनले सुनाए । छोराको सहयोगको लागि उनले अपिल गरेका छन् । उनको सम्र्पक नम्बर ९८११०३८०३४ रहेको छ । प्राइम बैंकको ०४२०१००००००३१२१०१६३७ खाता नम्बर रहेको छ ।

तेली समाजद्धारा ५१ ह्जार सहयोग
तेली कल्याण समाजले क्यान्सर पीडित नरेश कुमार साहलाई आर्थिक सहयोग गरेको छ । समाजले मंगलबार ५१ ह्जार रुपैयाँ नगद सहयोग गरेको हो । ५१ ह्जार मध्ये २१ ह्जार रुपैयाँ तेली कल्याण समाज विराटनगर १२ ले सहयोग गरेको थियो ।
नरेश कुमार साहका वावु विरेन्द्रलाई तेली कल्याण समाजका मोरङका अध्यक्ष डा. बालकृष्ण साह, कोषाध्यक्ष रोहित कुमार साह, विराटनगर महानगर अध्यक्ष सञ्जय साहको उपस्थिति आर्थिक सहयोग गरेका छन् ।
गत असारमा साहको खुट्टामा क्यान्सर भएको पत्ता लागेको थियो ।