विराटनगर । अन्तर विद्यालय यु–१५ प्रेसिडेन्ट कप फुटबल प्रतियोगिताको उपाधि विराटनगरस्थित दिल्ली पब्लिक स्कुल(डिपिएस) ले जितेको छ ।

विराटनगरको जुटमिलको खेलमैदानमा शनिबार सम्पन्न भएको फाइनलमा टाइब्रेकरमा अपूर्ण स्कुललाई ६–५ गोलले पराजित गर्दै डिपिएसले उपाधि जितेको हो । जितसँग डिपिएस स्कुल प्याब्सन मोरङले माघ २५ गते आयोजना गर्ने जिल्ला स्तरीय प्याब्सन स्पोर्ट्स मिटमा भाग लिन पाउनेछन् ।
निर्धारित समयसम्म खेल बराबारी भएपछि जितको छिनोफानो टाइब्रेकरबाट लिएको थियो । प्याब्सन नगरले आयोजना गरेको फुटबल प्रतियोगितामा विराटनगर महानगरपालिका भित्रका एक दर्जन बढी विद्यालयहरुले भाग लिएको प्रतियोगिताको संयोजक हिरा थापाले जानकारी दिए ।
बिजेता हुने खेलाडीहरुलाई प्याब्सन मोरङका अध्यक्ष प्रेमलालसिंह सुवाल, नगर अध्यक्ष नगेन्द्र प्रसाद ढकाललगायतले पुरस्कार वितरण गरेका थिए ।