विराटनगर । विगतका वर्षहरु झैं यस वर्ष पनि मोरङ व्यापार संघले विराटनगरमा ट्रेड एक्स्पो आयोजना गर्ने भएको छ । पुस ६ गतेदेखि १६ गतेसम्म विराटनगर – २ शंकरपुरमा रहेको खाली मैदानमा ‘मोरङ व्यापार संघ ट्रेड एक्स्पो’ अन्तर्राष्ट्रिस्तरको कृषि पर्यटन तथा औद्योगिक प्रदर्शनी आयोजना गर्न लागेको हो ।

सोमबार पत्रकार सम्मेलन गर्दै संघले आफ्नै नाममा एक्स्पो आयोजना गर्ने तयारी गरेको जानकारी गराएको छ । एक्स्पोमा २५० स्टल राखिने एक्स्पो संयोजक अनिल शाहले जानकारी दिए । एक्स्पोमा घरेलु साना तथा ठूला उद्योगका सामाग्रीसँगै भारत, बंगलादेश र पाकिस्तानका पनि स्टल रहने उनले बताए । एक्स्पोमा ४ लाख दर्शक आउने अपेक्षा राखिएको मोरङ व्यापार संघका अध्यक्ष नवीन रिजालले जानकारी दिए ।

तीन करोड रुपैयाँ खर्च गरेर आयोजना गरिने एक्स्पोमा १५ करोड रुपैयाँ कारोबार हुने अपेक्षा गरिएको रिजालले बताए । ‘यसअघि पनि विराटनगरमा विराट एक्स्पो लाग्दै आएको थियो । त्यसैलाई निरन्तरता दिन लागिएको हो,’ अध्यक्ष रिजालले भने, ‘यस पटक हुने एक्स्पो भव्य र सभ्य हुनेछ ।’ एक्स्पो भव्य रुपमा सम्पन्न गर्न संघका उपाध्यक्ष अनिल साहलाई संयोजक, संघका सचिव संजय श्रेष्ठ र कार्यकारिणी सदस्य अमित सारडालाई सह–संयोजकको जिम्मेवारी दिएको छ ।