विराटनगर । इलाका प्रहरी कार्यालय भाण्टाबारी, सुनसरीमा कार्यरत प्रहरी नायव निरीक्षक दुर्गा बहादुर पोमु लिम्बु उत्कृष्ट प्रहरी घोषित भएका छन् । कोशी प्रदेश प्रहरी कार्यालय विराटनगरले लिम्बुलाई कार्तिक महिनाको उत्कृष्ट प्रहरी घोषित गरेको हो ।
प्रहरी संगठन भित्र लिम्बु अपराध अनुसन्धानमा अब्बल प्रहरी अधिकृतको रुपमा परिचित रहेका छन् । उनी मोरङमा रहदा जघन्य अपराधको घटनाको सफल अनुसन्धान गरेका थिए । प्रविधिमा पोख्त मानिएका लिम्बुले गम्भिर प्रकृतिका जघन्य अपराधको घटनाको सुष्म अनुसन्धान गरी अभियुक्तहरु पक्राउ गरी कानुनी दायरामा ल्याउन सफल अधिकृतको रुपमा परिचत रहेका छन् ।

लिम्बुले विभागीय मूल्य मान्यता, आदेश– निर्देशनको पालना गरी उच्च मनोबल र साहसका साथ आफ्नो कर्तव्य निर्वाह गरेको भन्दै उत्कृष्ट प्रहरी घोषित गरेको कोशी प्रदेश प्रहरी कार्यालय विराटनगरका डिआइजी राजेशनाथ बास्तोलाले बताए । लिम्बुले धरान ३ स्थित सुन पसलमा डाँका चोरी भएको घटनामा संलग्न व्यक्तिहरूलाई पक्राउ गरेका थिए ।
लिम्बुले सम्पादन गरेको उत्कृष्ट कार्यको उच्च मूल्याङ्कन गर्दै २०८० साल कार्तिक “महिनाको सर्वोत्कृष्ट प्रहरी’ घोषणा गरिएको प्रदेश प्रहरीले जनाएको छ ।