विराटनगर । मोरङको कटहरी गाउँपालिकाले प्रहरीलाई साइकल र प्राविधिक सामाग्री वितरण गरेको छ । कटहरी गाउँपालिका परिसरमा सोमबार एक कार्यक्रम आयोजना गरी  मोरङ प्रहरी र ट्राफिक प्रहरीलाई  १० थान साइकल, १ थान कम्प्युटर, १ थान प्रिन्टर, २१ थान ट्राफिक कोण वितरण गरिएको हो । 

गत भदौ २६ गते कार्यपालिकाको बैठकले प्रहरीलाई साइकल र प्राविधिक सामाग्री गरी १ लाख ८६ हजार ९४६ रुपैयाँ सामाग्री वितरण गर्ने निर्याण गरेको थियो । उक्त निर्याण पछि प्रहरीलाई साइकल र प्राविधिक सामाग्री कटहरी गाउँपालिका अध्यक्ष देवराज चौधरीले मोरङ प्रहरी प्रमुख एसपी दीपक पोखरेललाई हस्तान्तरण गरेका थिए । कार्यक्रममा बोल्दै कटहरी गाउँपालिकाका अध्यक्ष चौधरीले प्रहरीलाई साधन स्रोत मैत्री बनाउने कामको सुरुवात गरिएको बताए । भएको सीमित स्रोत साधनले काम गर्दै आएको प्रहरीलाई साधन स्रोत सम्पन्न बनाउन तीन तहको सरकार लागि पर्नुपर्ने बताए । प्रहरीलाई गस्ती गर्न सहज पु¥याउने उद्देश्यले साइकल वितरण गरिएको उनले बताए ।  सईको नेतृत्वमा कटहरिमा प्रहरी चौकी स्थापना भएको छ । पाँच कट्ठा क्षेत्रफलमा भवन बनाउने काम पनि भइरहेको उनले बताए । 

कार्यक्रममा मोरङ प्रहरी प्रमुख एसपी दीपक पोखरेलले  सीमित स्रोतसाधनले प्रहरीले शान्ति सुरक्षा कायम गर्दै आएको बताए । कटहरिबाट सहयोग प्राप्त भएको साधन स्रोतले शान्ति सुरक्षामा थप सहयोग पुग्ने बताए । शान्ति सुरक्षा प्रहरीले एक्लै मात्र सम्भव नभएको बताउँदै उनले सबैको साथ सहयोगको खाँचो रहेको बताए ।  ट्राफिक नियमको  पालना गरेर सवारी दुर्घटना न्यूनीकरण गरिनुपर्नेमा उनले जोड दिए । भएको कानुन कार्यान्वयन सबैको साथ सहयोग गरेर अपराध रोकथाम र नियन्त्रणमा सहयोग सबैले खेल्नुपर्ने एसपी पोखरेलले बताए । 

कार्यक्रममा कटहरी गाउँपालिकाकी उपाध्यक्ष  सिता देवी राजवंशी, वडा अध्यक्ष, सदस्य, मोरङ प्रहरीका प्रवक्ता डिएसपी रन्जन कुमार दाहाल, जिल्ला ट्राफिक प्रहरी कार्यालय मोरङका प्रमुख प्रहरी निरीक्षक सुमन न्यौपानेलगायतको उपस्थिति रहेको थियो ।