विराटनगर । राष्ट्रिय सौन्दर्यकर्मी युनियन नेपाल महानगर कमिटी विराटनगरले ११३ औँ अन्तर्राष्ट्रिय महिला श्रमिक दिवसको अवसर पारेर दुई जना ब्यूटिसियनलाई सम्मान गरेको छ । 

राष्ट्रिय सौन्दर्यकर्मी युनियन नेपाल विराटनगरका निवर्तमान अध्यक्ष अमिता पोखरेल र निवर्तमान उपाध्यक्ष गीता भट्टराईलाई सम्मान गरिएको हो । सम्मानित व्यक्तिहरूलाई कदर र पत्र र दोसल्ला ओढाएर कार्यक्रमको प्रमुख अतिथि पूर्व सांसद योसदा अधिकारी र सौन्दर्यकर्मी युनियन नेपाल विराटनगरकी अध्यक्ष भली सुब्बा गुरूङ्गले सम्मान गरेकी थिइन् । 

सौन्दर्यकर्मी युनियन नेपाल विराटनगरले होली मिलन कार्यक्रम पनि आयोजना गरेको छ । कार्यक्रम सञ्चालन सौन्दर्यकर्मी युनियन नेपाल विराटनगर महानगरकी सचिव बसन्ती गुरूङ्गले गरेकी थिइन् । 

कार्यक्रमको प्रमुख अतिथि पूर्व सांसद यशोदा अधिकारीले हरेक क्षेत्रमा महिलाको सहभागिता सुनिश्चित गर्दै निर्णायक तहमा महिलाको स्थान सुरक्षित हुनुपर्ने बताइन् । समाजमा जरो गाडेको पुरातन वादी सोचमा परिवर्तन र पुरुषवादी मानसिकतामा शुद्धीकरण भई समानताको व्यवहार देखिनुपर्ने बताइन् । 

सौन्दर्यकर्मी युनियन नेपाल विराटनगरकी अध्यक्ष भली सुब्बा गुरूङ्गले सौन्दर्यकर्मी पेशाले महिलाहरूलाई आत्मनिर्भरमा ठुलो सहयोग पुगेको बताइन् । उनले ब्यूटिसियन सम्मानित पेशाको रूपमा हेरेर यसलाई मर्यादित र व्यवसायीक रूपमा अगाडी बढुनपर्नेमा जोड दिइन् । 

कार्यक्रममा एसबी नेपालकी अध्यक्ष विष्णु शर्माले महिला भएकै कारण सांस्कृतिक, आर्थिक, शारीरिक एवं मानसिक रूपमा हुने विभेद अन्त्य गरिनुपर्ने बताइन् । महिला हिंसा र विभेदको अन्त्य गरी पीडित महिलालाई क्षतिपूर्ति सहितको न्याय दिलाई महिलाको हक अधिकारको संरक्षण गर्दै नीतिगत कानुनी एवं व्यवहारगत सुधार गरिनुपर्ने उनको भनाई छ ।

कार्यक्रममा राष्ट्रिय सौन्दर्यकर्मी युनियन नेपालको केन्द्रीय कमिटीकी उपमहासचिव ममता प्रधान, नेपाल ट्रेड  युनियन महासङ्घ महिला कमिटी कोसी प्रदेशकी अध्यक्ष डोमा गिरी राई, नेपाल घरेलु तथा साना उद्योग महासङ्घ मोरङ महिला उद्यम समितिका अध्यक्ष सुनिता छाराङ्गगायतको उपस्थिति रहेको थियो ।