विराटनगर । जेसीजले समाजमा रहेका युवालाई अघि बढाउन र उनीहरूको क्षमता अभिवृद्धि गर्न महत्त्वपूर्ण भूमिका खेलेको एक कार्यक्रममा सहभागीहरूले बताएका छन् ।
विराटनगर जेसीजले जेसीज सप्ताह कार्यक्रम अन्तर्गत बिहीबार चौथो दिनको कार्यक्रम ‘प्रहरी सँग जेसीजका युवा’ कार्यक्रममा सहभागीहरूले यस्तो बताएका हुन् ।

कार्यक्रममा बोल्दै विराटनगर जेसीजका पुर्वअध्यक्ष श्याम सुन्दर पौडेल मिलनले जेसीजले १८ देखि ४० वर्षका युवाहरूको नेतृत्व र व्यक्तित्व विकास गराउँदै समाजमा हस्तान्तरण गराउने संस्थाका रूपमा रहेकोले प्रहरीसँग जेसीजका युवा कार्यक्रम फलदायी रहेको बताए । आगामी दिनमा प्रहरी र जेसीज युवाहरू समन्वय र सहकार्य गरी काम गरिनुपर्ने बताए ।
कार्यक्रममा विराटनगर जेसीजको पुर्वअध्यक्ष सुरेशलाल श्रेष्ठले जेसीजले समाजमा रहेका युवालाई अघि बढाउन महत्त्वपूर्ण भूमिका खेल्ने गरेको बताए । यस्ता कार्यक्रम एकदमै महत्त्वपूर्ण रहेको जानकारी गराउँदै उनले समाजमा हुने गरेका विभिन्न आपराधिक घटना न्यूनीकरण गर्न सबैको साथ सहयोगको खाँचो रहेको बताए ।

कार्यक्रममा मोरङ प्रहरीका डिएसपी टीका बहादुर कार्कीले जेसीजले समाजमा गर्ने गरेका कामको बारेमा आफू परिचित रहेको बताए । नेतृत्व विकासका लागि जेसीजले गर्ने गतिविधि सरहनिय रहेको उनले बताए । शान्ति सुरक्षा सुव्यवस्थापन कायम गर्न सबैको साथ सहयोगको खाँचो रहेको उनले बताए ।

कार्यक्रममा मुख्य संयोजक अभिनास थापा रहेका थिए । विराटनगर जेसीजका अध्यक्ष देवचन्द्र घिमिरेको अध्यक्षतामा यो कार्यक्रम सम्पन्न भएको थियो ।

सप्ताह कार्यक्रममा विभिन्न गतिविधि मार्फत जेसीज समाज सँग जोडिने क्रममा पहिलो दिन स्लो साइकल रेस, दोस्रो कार्यक्रम मायासहितको रासन, स्कुल ब्याग तथा स्टेसनरी कार्यक्रम, तेस्रो कार्यक्रम निः शुल्क स्वास्थ्य शिविर सम्पन्न भइसकेको छ । सप्ताह कार्यक्रमको समापन शनिवार विराटनगरमा हुनेछ ।