विराटनगर । युनाईटेड भेट्रान्स क्लब विराटनगर १ नं. प्रदेश स्तरीय प्रथम टुबोर्ग मिल्स भेट्रान्स गोल्ड कपको क्वाटरफाइनलमा पुगेको छ । विराटनगर जुट मिलको खेलमैदानमा सोमबार भएको पहिलो खेलमा दुहबी भेट्रान्स क्लब दुहबीलाई १–० गोलले हराउँदै युनाईटेड भेट्रान्स क्लब विराटनगर क्वाटर फाइनलमा पुगेको हो ।

युनाईटेडलाई जित दिलाउन हर्कराज गुरूङले निर्णायक गोल गरे । खेल सुरू भएको तीन मिनेटमा हर्कले डिबक्स भित्रबाट गरेको प्रहार गोलमा परिणत भएको थियो । खेलको म्यान अफ द म्याच पनि निर्णायक गोल गर्ने युनाईटेडका हर्कराजर गुरूङ घोषित भए । उनले नगद २ हजार १ सय रुपैयाँ पाए ।

पहिलो हाफमा अग्रता लिएपछि दोश्रो हाफमा युनाइटेडले सुरुवातदेखि नै दुहबीमाथि दबावमा राखेको थियो । दुहबी र युनाईटेडका खेलाडीहरूले पाएको थुप्रै अवसरहरू खेर फालेका थिए ।

अहिले दोस्रो खेलमा बिर्तामोड भेट्रान्स र भरौल भेट्रान्स क्लब बिच प्रतिस्पर्धा गर्दैछन् । दोस्रो खेल विराटनगर जुट मिलको खेलमैदानमा जारी छ ।