विराटनगर । विराटनगर – ७ मा रहेको मेरिल्याण्ड कलेजमा अध्ययनरत दिया अग्रवालले कक्षा १२ को परीक्षामा  नेपाल प्रथम भएपछि कलेजले नगद ५१ हजार रूपयाँ सहित सम्मान गरेको छ । 

कलेज परिसरमा सोमवार संविधान दिवसको अवसर पारेर राष्ट्रिय परीक्षा बोर्डले लिएको परीक्षामा व्यवस्थापन सङ्कायमा नेपालमै उच्चतम अङ्क ३.९६ जिपिए ल्याउने अग्रवाललाई मेरील्याण्डले विशेष सम्मान गरेको हो ।

अग्रवालसहित कक्षा – १२ को बोर्ड परीक्षामा ए प्लस ल्याउने विद्यार्थी र अभिभावकहरूलाई पनि सम्मान गरिएको छ । सम्मानित हुने विद्यार्थीहरूलाई प्रदेश १ सामाजिक विकास मन्त्री राजन राईले सम्मान गरेका थिए ।

कार्यक्रममा बोल्दै नेपाल प्रथम हुने दिया अग्रवालले कलेजको राम्रो शैक्षिक वातावरण र कडा मेहनतले गर्दा आफू सफल हुन सकेको बताइन् । ‘विद्यार्थीहरूलाई परीक्षाको वेलामा मात्रै होइन । सधैँ रुटिन बनाएर दैनिक ३–४ घण्टा पढेमा सफलता सजिलै प्राप्त गर्न सकिनेछ,’ उनले भनिन्, ‘कडा मेहनतको साथ यो सफलता हाता परेको हो ।’ दियाका बाबु सूचित कुमार अग्रवालले मेरिल्याण्ड कलेजको गुणस्तरीय शिक्षाको कारणले छोरीले सफलता हात पारेकी बताइन् ।

कार्यक्रममा प्रमुख अतिथि प्रदेश १ का सामाजिक विकास मन्त्री राजन राईले मेरिल्याण्डकी छात्रा दियाले प्रदेश १ कै गहना भएकोले व्यवस्थापन शिक्षामा अग्रणी भूमिका खेलेको बताए । मेरिल्याण्डको २० वर्षको सफलता सुनेर धेरै खुसी व्यक्त गर्दै गुणस्तरीय शिक्षामा जोड दिए ।
कार्यक्रममा बिबिएस् तेस्रो वर्षमा नेपाल प्रथम सिम्रन अग्रवाल र बिबिएस् दोस्रो वर्षमा प्रदेश प्रथम राजलक्ष्मी अग्रवाललाई पनि सम्मान गरिएको थियो । कार्यक्रममा कलेजका अध्यक्ष गुणराज ढुङ्गेलको अध्यक्षतामा भएको थियो ।

कार्यक्रममा पुनम गुप्ता, देव किशोर मुन्डडा, भिखम चन्द सरल, समाजसेवी सुरेश राज शर्मा, हिसानका केन्द्रीय सदस्य राजेश कार्की लगायतले मेरिल्याण्ड विराटनगरको मात्र नभई देशकै शान भएको बताए । गुणस्तरीय शिक्षा दिएको कारणले मेरिल्याण्ड व्यवस्थापन शिक्षामा पूर्वकै तथा देशकै अग्रणी शैक्षिक संस्थाको रूपमा परिचित रहेको छ ।