विराटनगर । मुस्ताङ विराट मेघा भेट्रान्स फुटबल प्रतियोगितामा हाटखोला भेट्रान फुटबल क्लब विराटनगरमा क्वाटरफाइनलमा पुगेको छ ।
विराटनगरको सहिद मैजानमा सोमबार राती भएको खेलमा हाटखोलाले आयोजक विराट मेघा भेट्रान क्लबलाई १० – ० को फराकिलो गोल अन्तरले हराउँदै क्वाटरफाइनलमा पुगेको हो ।

राजकुमार घिसिङले ह्याट्रिक गोल गर्दै म्यान अफ द म्याच भए । म्यान अफ द म्याच हुने खेलाडी घिसिङलाई कार्यक्रमको प्रमुख अतिथि नेपाल उद्योग वाणिज्य महासंघ प्रदेश नं. १ का उपाध्यक्ष राजेन्द्र राउतले पुरस्कार वितरण गरे ।

राष्ट्रिय टोलीका पूर्व कप्तान सागर थापा र विक्रम श्रेष्ठले २–२ गोल, तेजबहादुर घलानी, सुमन श्रेष्ठ तथा नरेश श्रेष्ठले समान १–१ गोल गर्दै टोलीलाई विजयी बनाए ।
खेलको पूरै सयम आफ्नो कब्जा राख्दै खेलको हाटखोलाको जितमा अन्तर्राष्ट्रिय खेल खेलेर अनुभव बढेका खेलाडीको संख्या धेरै रहेको थियो । हाटखोलाबाट राष्ट्रिय टोलीका पूर्व कप्तान सागर थापासहित ८ जना ‘ए’ डिभिजन खेलमा सहभागी भई अनुभव बटुलेका खेलाडी मैदानमा थिए । सुरेन्द्र तामाङ बाहेक अन्य खेलाडी अनुभवविहीन रहेको फाइदा उठाउँदै हाटखोलाले फराकिलो गोल संख्यामा जित निकाल्न सफल भएको हो ।

खेलको १६ औं मिनेटमा गोल गर्दै विक्रम श्रेष्ठले अग्रता दिलाए । त्यसपछि २१ औं मिनेटमा तेजबहादुरले गोल गर्दै टोलीको अग्रता दोब्बर बनाए । पहिलो हाफमै थकित विराट मेघाविरुद्ध हाटखोलाका लागि खेलको २८ औं मिनेटमा सुमन श्रेष्ठले तेस्रो गोल गरे । धनकुटा घर भएका सुमन धरानस्थित एन्फा एकेडेमीका प्रशिक्षक तथा पूर्व राष्ट्रिय खेलाडी हुन् । ३९ औं मिनेटमा नरेश श्रेष्ठले गोल गरे । ४५ औं मिनेटमा राजकुमार घिसिङले खेलको पाँचौ गोल गरे ।
कप्तान सागर थापाले ४७ औं र ५५ औं मिनेटमा गोल गरे । राजकुमारले ४९ औं मिनेटमा गोल गर्दै आफ्नो व्यक्तिगत गोल संख्या २ पु¥याउन सफल भए । उनले गोल गरेको ३ मिनेट नबित्तै ५१ औ मिनेटमा विक्रम श्रेष्ठले व्यक्तिगत दोस्रो र टोलीका लागि आठौं गोल गरे । राजकुमारले ६७ औं मिनेटमा ह्याट्रिक पूरा गरे ।
प्रतियोगिताअन्तर्गत मंगलबार मधेस प्रदेशको लाहन भेट्रान क्लबले आयोजक विराट मेघा भेट्रान क्लब ‘बी’ को सामना गर्ने छ ।