विराटनगर, २६ साउन। शिक्षा, स्वास्थ्य, वातावरणलगायतका क्षेत्रमा विभिन्न सामाजिक कार्यहरु गर्दै आएको रोटरी क्लब अफ विराटनगर डाउनटाउनले विद्यार्थीहरुलाई छाता वितरण गरेको छ ।

गर्मी र वर्षाका कारण विद्यालय जानबाट वञ्चित विद्यार्थीहरुलाई क्लबले छाता वितरण गरेको क्लबकी अध्यक्ष रेखा रार्ठीले जानकारी दिइन् । क्लबले विपन्न समुदायमा शिक्षा फैलाउने काम गरिरहेको छ ।

सीमान्तकृत समुदायका बालबालिकालाई नियमित विद्यालय जान प्रोत्साहन गर्ने उद्देश्यले विराटनगर खर्जी गाउँस्थित ज्योति आधारभूत विद्यालयका सवै (१५०) विद्यार्थीलाई रोटरी प्रतीक छापिएको छाता वितरण गरिएको क्लबकी सचिव सचिव नमिता टिवडेवालले बताइन् ।

छाताले विद्यार्थीहरूलाई असहनीय गर्मी र वर्षाबाट पनि जोगाउनेछ, जसले गर्दा विद्यालयमा विद्यार्थीको हाजिरी बढ्ने क्लबकी पब्लिक इमेज कमिटी चेयर सपना सिंघलले जानकारी दिइन् । उनका अनुसार उक्त छाताहरू एनआईसी एशिया बैंकको प्रायोजनामा वितरण गरिएको थियो ।