विराटनगर, २७ जेठ । प्रदेश १ का पूर्व मुख्यमन्त्री शेरधन राईले प्रदेश १ को पाँच दलिय गठबन्धन सरकार कमिशन तन्त्रमा फसेको आरोप लगाएका छन् । शुक्रबार आर्थिक वर्ष २०७९–८० को वार्षिक नीति तथा कार्यक्रममाथिको छलफलमा भाग लिँदै पूर्वमुख्यमन्त्री राईले यस्तो आरोप लगाएका हुन् ।

उनले वर्तमान सरकार भूमाफियासँग मिलेको र कर्मचारीबाट अशुली धन्दामा लागेर वर्तमान सरकार संघीयताको अभ्यासलाई कमजोर बनाउन खोजेको दावी गरे ।

मुख्यमन्त्री पदबाट बाहिरिएपछि पहिलोपटक प्रदेशसभामा सम्बोधन गरेका राईले वर्तमान गठबन्धन सरकार मिलेर खानका लागि मात्र बनेको बताए । उनले नीति तथा कार्यक्रममा सरकार आफै रणभुल्लमा परेको आरोप लगाए ।

उनले सरकारले आर्थिक वर्ष २०७९÷८० का लागि ल्याएको नीति कार्यक्रमले प्रथामिकता भूलेको बताए । एमाले नेतासमेत रहेका मुख्यमन्त्री राईले पूर्ववर्ती सरकारले गरेको कामलाई बर्तमान सरकारले आफुले गरेको भन्दै जस लिन खाजेको समेत आरोप लगाए ।