काठमाडौं, २८ माघ । प्रमुख प्रतिपक्षी दल नेकपा एमालेका अध्यक्ष केपी शर्मा ओलीले पार्टी विभाजन गर्नेहरूसँग चुनावी तालमेल नहुने बताएका छन् ।

स्थानीय तहको निर्वाचनको तयारीबारे सातै प्रदेशमा हुन लागेको प्रशिक्षण कार्यक्रमको शुक्रबार भर्चुअल रूपमा शुभारम्भ गर्दै अध्यक्ष ओलीले पार्टी फुटाउनेहरूसँग चुनावी तालमेल हुन्छ कि भन्ने भ्रम नपाल्न कार्यकर्ताहरूलाई आग्रह गरेका हुन् ।

कतिपयमा चुनाव अघि पार्टी एकता हुन्छ कि चुनावी तालमेल हुन्छ कि भन्ने भ्रम रहेको भन्दै ओलीले भने, ‘पार्टी विभाजन गर्ने तत्वहरूसँग चुनावी तालमेल र पार्टी एकता हुँदैन ।’

अध्यक्ष ओलीले आफ्नो पार्टी फुटाउन भूमिका खेल्ने र षड्यन्त्र गर्नेहरूसँग पनि सहकार्य नहुने बताए ।

‘पार्टी फुटाउने, त्यसको नेतृत्व गर्ने र साउन २५ गते पार्टीले निष्कासन गरेका १४ सांसदमाथि कारबाहीको सूचना जारी नगरेर पार्टी फुटाइयो । त्यस प्रकारका षड्यन्त्रमा लागेका तत्वहरूसँग चुनावी तालमेल हुन्छ कि पार्टी एकता हुन्छ कि भन्ने भ्रम नराखे हुन्छ । आशंका नगरे हुन्छ पार्टी फुटाउनेहरूसँग कुनै चुनावी तालमेल गर्दैंनौं,’ उनले भने, ‘हामी चुनाव एक्लै लड्छौं र जित्छौं ।’

अध्यक्ष ओलीले देश र जनताका लागि काम गरेकाले जनता आफूहरूको साथमा रहेको बताए । उनले देश र जनताको हितविपरीत कुनै पनि काम गर्न दिने बताए ।

अध्यक्ष ओलीले स्थानीय तहको निर्वाचनमा पनि राष्ट्रियस्तरमा कुनै पनि दलसँग तालमेल नहुने बताए । ‘हामी एक्लै निर्वाचन लड्छौं । स्थानीय तहमा कहीँकतै तालमेल भएछ भने बेग्लै कुरा हो । राष्ट्रियस्तरमा कुनै पनि दलसँग चुनावी तालमेल गरेर जाँदैनौं । एक्लै लड्छौँ र विजयी हात पार्छौं,’ उनले भने ।