विराटनगर, १७ माघ । पाँचदलिय गठबन्धन नेतृत्वको प्रदेश सरकारले चर्को आलोचना हुने विषय लुकाएर अरु निर्णय मात्र सार्बजनिक गरेको छ ।

आइतबार साँझ बसेको मन्त्रीपरिषद बैठकले सत्ता गठबन्धनमा भागबण्डा मिलाउन मन्त्रालयहरु फुटाएर १२ वटा बनाउने निर्णय गरेको थियो । तर, सार्बजनिकरुपमा चर्को आलोचना हुनेभएपछि उक्त निर्णय प्रदेश सरकारले ‘गुपचुप’ राखेको हो ।

आइतबार बसेको मन्त्रीपरिषद बैठकले प्रदेश राजधानीका संरचनाका लागि जग्गा खोज्न कार्यदल गठन गर्नेसहित आधादर्जन निर्णय आर्थिक मामिला तथा योजना मन्त्री इन्द्र आङ्बोले सार्बजनिक गरेपनि प्रदेश सरकारले गरेको मन्त्रालय फुटाउने निर्णय ‘गुपचुप’ राखेको हो ।

मुख्यमन्त्री राजेन्द्र राईले मन्त्रीपरिषद बैठकले मन्त्रालय विभाजनको निर्णय गर्ने बताएका थिए । तर, आइतबारको बैठकले मन्त्रालय फुटाउने गरेको निर्णय भने सार्बजनिक गरिएन ।

मन्त्रालय फुटाउने हल्ला चलेसँगै प्रदेशमा सरकारको चर्को आलोचना हुँदै आएको थियो । मन्त्रालय फुटाउने निर्णय सार्बजनिक गर्दा चौतर्फी आलोचना हुने भएकाले सो निर्णय सार्बजनिक नगरिएको मुख्यमन्त्री राई निकट स्रोतले जनाएको छ ।