एजेन्सी, १० माघ । रुसले युक्रेनको सिमानामा एक लाखभन्दा सेना जम्मा गरेपछि उत्पन्न विवादका बीच उत्तर एटलान्टिक सन्धि संगठन (नेटो) ले पूर्वी युरोपका मुलुकमा लडाकु विमान र शिप परिचालन गरेको छ । रुसले युक्रेनमा आक्रमण गर्न सक्ने भन्दै अमेरिका र नेटो गठबन्धनले यसअघि चेतावनी दिँदै आएका थिए ।

रुसले युक्रेनलाई नेटो गठबन्धनमा समावेस हुनबाट रोक्न भन्दै सीमा क्षेत्रमा ठूलो संख्यामा सेना परिचालन गरेको छ । रुसले युक्रेनमाथि आक्रमण गर्न सेना परिचालन गरेको अमेरिका र उसका नेटो सहयोगी पश्चिमा युरोपेली मुलुकले दाबी गर्दै आएका छन् । तर, रुसले यस्तो आरोप खारेज गर्दै आएको छ ।

गत शुक्रबारमात्र अमेरिकी विदेशमन्त्री र रुसी विदेशमन्त्रीबीच वार्ता भएको थियो । सो वार्तामा कुनै सहमति नजुटेपछि दृश्यहरु झन तनावपूर्ण बन्दै गएका छन् । अमेरिकाले किभबाट आफ्ना दूतावासका कर्मचारी फिर्ता गरेको भोलिपल्ट सोमबार बेलायतले पनि कर्मचारी फिर्ता बोलाएको छ । लिथुअनियामा एफ–१६ लडाकु जेट, रोमानियामा सेना, बुल्गेरियामा एफ–३५ लडाकु विमान र बाल्टिक सागरमा लडाकु शिप परिचालन गरिएको अन्तर्राष्ट्रिय सञ्चारमाध्यमहरूले जनाएका छन् ।

सोमबारै नेटोसम्बद्ध मुलुकहरूले लडाकु विमान र लडाकु शिप परिचालन गरेका हुन् ।