एजेन्सी, १० माघ । तालिबानकाे एक प्रतिनिधिमण्डलले नर्वेमा आज पश्चिमी देशका अधिकारीसँग बैठक गरिरहेका छन् । अफगानिस्तान कब्जा गरेपछि पश्चिमी देशका अधिकारीसँग तालिबान प्रतिनिधिमण्डलको यो पहिलो भेट हुनेछ ।

तीन दिवसीय बैठकमा मानवाधिकार र मानव त्रासदीजस्ता मुद्दामा विशेषगरी चर्चा हुने अनुमान गरिएको छ ।यद्यपि, युरोपमा केही जनता तालिबानसँग भइरहेको यो बैठकको विरोध पनि गरिरहेका छन् ।

बैठककाे विराेधमा केही स्थानमा प्रदर्शन पनि गरिँदैछ । प्रदर्शनकारीका अनुसार तालिबानसँग यस्तो बैठकको आयोजना गरेर उनीहरूलाई महत्व दिइनु हुँदैन ।

आइतबार, तालिबानका सदस्यले मानवाधिकार कार्यकर्तासँग पनि भेटघाट गरेका छन् । यद्यपि, उनीहरूबीच कुन मुद्दामाथि कुराकानी भयो, त्यसको कुनै जानकारी सार्वजनिक भएको छैन ।

आज हुने तालिबान सदस्य र युरोपेली अधिकारीहरूबीचको बैठकलाई निकै चासोका साथ हेरिएको छ । संयुक्त राष्ट्र संघका अनुसार अफगानिस्तानमा करिब ९५ प्रतिशत जनसंख्यासँग अहिले पर्याप्त मात्रामा खाना छैन ।