विराटनगर, २५ असोज । मोरङको धनपालथान गाउँपालिकास्थित कर्सियामा लुटाराहरुको समुहले बैंक लुट्ने प्रयास गरेको छ । सोमबार अपराहन्न लुटेराको एउटा समुहले कर्सिया बजारस्थित सिटिजन बैंकको शाखामा रकम लुट्ने असफल प्रयास गरेको हो ।

सोमबार दिउँसो सिटिजन बैंकको कर्सिया शाखामा रकम लुट्ने उद्देश्यले छिरेका लुटेराहरुलाई सुरक्षागार्डले रोक्न खोजेका थिए । बैंक भित्र प्रवेश गर्न नदिएपछि उनीहरुले बैंकका एक जना सुरक्षा गार्ड माथि गोलि प्रहार गरेका छन् ।

गोलि प्रहारबाट गम्भिर घाइते भएका सुरक्षा गार्डको विराटनगरमा उपचार भइरहेको प्रहरीले जनाएको छ । लुटेराहरुले गार्डलाई गोलि प्रहार गरेपछि हो हल्ला भएर फरार भएका थिए ।

घटनाको केही समयमै बैक लुट्ने असफल प्रयास गरेका लुटेराहरुलाई प्रहरीले पक्राउ गरेको छ । दुई भारतीय र एक नेपाली नागरिक रहेका लुटेराहरुलाई नेपाल भारत सीमा नजिकै खयरबनाबाट पक्राउ गरिएको जिल्ला प्रहरी प्रहरी कार्यालय मोरङका प्रमुख प्रहरी उपरिक्षक जनाद्र्धन जिसिले जानकारी दिए ।

पक्राउ गर्ने क्रममा प्रहरीले लुटेरामाथि गोलि चलाएको छ । प्रहरीको गोलि लागेर लुटेरा समुहका एक जना घाइते भएका छन् । पक्राउ परेका लुटेराहरुको पहिचान प्रहरीले गोप्य राखेको छ । उनीहरूलाई अहिले इलाका प्रहरी कार्यालय रंगेलीमा राखेर अनुसन्धान सुरू गरिएको जिल्ला प्रहरी कार्यालय मोरङले जनाएको छ ।