सिरहाको लहानमा सुनचाँदी व्यवसायीको घरमा लुटपाट भएको छ । लहान-२३ मा सुनचाँदी व्यवसायी प्रदीप विश्वकर्मा हत्या र लुटपाट घटनाको ३६ घण्टा पनि नबित्दै लहान-७ मा फेरि लुटपाट भएको हो ।

लहान-७ का सुनचाँदी व्यसायी राजेश सारडाको घरमा साँझ लुटपाट भएको प्रहरीले जनाएको छ । लुटेराहरूको समूहले सारडाको बा १० च ९३०२ नम्बरको कार नै चोरेर लगेका छन् ।

घटनाको थप विवरण भने आउन बाँकी छ । आफूहरू अहिले खोजबिन तथा अनुसन्धानमै रहेकाले घटनाको विस्तृत विवरण भन्न नसकिने लहान प्रहरीले जनाएको छ ।

‘कार नै चोरेर लगेको जानकारी आएको छ,’ लहानका डीएसपी डा. तपन दाहालले भने, ‘हामी खोजबिन र अनुसन्धानमा खटेका छौँ, सबै डाटा अहिले छैन ।’

लहानमा पछिल्लो एक सातामा तीनवटा लुटपाट तथा डकैतीका घटना घटेका छन् । बढ्दो लुटपाट तथा डकैतीका घटनाले यहाँका सर्वसाधारण त्रासमा छन् ।