विराटनगर, १० चैत । एक वर्षको अवधिमा प्रदेश १ मा क्षयरोगबाट एक सय १३ जनाको मृत्यु भएको छ । विश्व क्षयरोग दिवसको पूर्व सन्ध्यामा मंगलबार ग्लोबल फन्ड, नेपाल सरकारको सहयोग र सेभ द चिल्ड्रेनको आयोजनामा विराटनगरमा आयोजित अन्तक्रियामा गएको एक वर्षमा क्षयरोगका कारण उक्त संख्यामा मानिसहरुले ज्यान गुमाएको जनाइएको छ ।

प्रदेश १ मा आर्थिक वर्ष २०७६÷७७ मा तीन हजार सात सय ४५ बिरामी भेटिएको छन् । जसमा इलाम, झापा, मोरङ्ग ,सुनसरी र उदयपुरमा सबैभन्दा बढी ८९ प्रतिशत बिरामी रहेको प्रदेश १ का क्षयरोग कार्यक्रमका संयोजक शैलेश भुजेलले जानकारी दिए । उनका अनुसार क्षयरोग लागेर नियमित औषधि सेवन गरेका ९० प्रतिशत रोगी निको भएका छन् ।

नेपाल क्षयरोग प्रिभ्यालेन्स सर्भे २०७६ का अनुसार नेपालमा प्रत्येक वर्ष करिब ६९ हजार क्षयरोगका नयाँ बिरामी भेटिने गरेका छन् । नेपालमा प्रति १ लाख जनसंख्यामा २ सय ४५ का दरले क्षयरोगका नयाँ बिरामी देखिने गरेको अन्तरकृयामा बताइएको छ ।

अन्तरक्रियामा क्षयरोग नङ र कपाल बाहेक शरीरको जुनसुकै अङ्गमा हावाका माध्यमबाट सर्न सक्ने रोग भएकोले रोग लागिसकेको खण्डमा नछुटाई ६ महिना देखि १० महिना सम्म औषधि सेवन गरेको अवस्थामा यो रोग पूर्णरुपमा निको हुने भुजेलले जानकारी दिए । सरकारले सन् २०५० सम्ममा नेपालबाट क्षयरोग निवारण गर्ने लक्ष्य लिएको छ ।