विराटनगर । कोशी प्रदेशमा विद्रोहीलाई साथ दिएको नेकपा एमाले एक महिना नबित्दै पुनः विपक्षमा पुगेको छ। एमालेले केदार कार्की नेतृत्वको सरकार छाडिसकेको छ।
एमाले सोमबारदेखि प्रदेश सभामा विपक्षी लहरमा बस्ने भएको छ। विपक्षमा बसे पनि कार्की नेतृत्व सरकारलाई दिएको विश्वासको मत भने कायमै राख्ने निर्णय एमालेले गरेको छ।

सोमबार विराटनगरमा बसेको संसदीय दलको बैठकले तत्काललाई भने समर्थन कायमै राख्ने निर्णय गरेको प्रमुख सचेतक रेवतीरमण भण्डारीले बताए।

नेपाली कांग्रेसमा विद्रोह गरेका केदार कार्कीलाई असोज २७ मा मुख्यमन्त्री नियुक्त हुँदा साथ दिएको एमालेले प्रदेशमा कांग्रेस र एमाले मिलेर सरकार चलाउनु पर्ने अडान राखेको थियो।

तर मुख्यमन्त्री कार्कीले गठबन्धन दलहरुलाई सरकारमा सामेल गराएपछि एमाले सरकारबाट बाहिरिएको हो । शुक्रबार प्रदेशमा नेकपा माओवादी, नेकपा एकीकृत समाजवादी सरकारमा सामेल भएका थिए। एमालेबाट मन्त्री बनेका राम रना मगरले शनिबार राजीनामा दिएका थिए।

मुख्यमन्त्री कार्कीले कात्तिक १ मा विश्वासको मत लिएका थिए। उनलाई राप्रपाबाहेकका सबै दलले विश्वासको मत दिएका थिए।

पूर्व मुख्यमन्त्री एवं एमाले संसदीय दलका नेता हिक्मतकुमार कार्कीले एमाले सत्ताको दौडमा नरहेको दाबी गर्दै विपक्षमा बस्ने निर्णय गरेको बताएका छन्।

‘चुनावदेखि चुनावसम्म र सत्तादेखि सत्ताको यात्रामा एमाले छैन’, उनले भने, ‘गठबन्धन दलको सत्ता स्वार्थले कोशी प्रदेशमा प्रदेश सभालाई मध्यावधिमा धकेल्ने अवस्था आइसकेपछि व्यवस्था माथिको प्रहारलाई रोक्न,सन्निकटमा हुन सक्ने मध्यावधि रोक्न र प्रदेश संरचनालाई स्थापित गर्न एमालेले कांग्रेसका कार्कीलाई समर्थन गरेर सरकार गठन गर्न सहयोग गरेका हौं।’

अहिले सहकार्यको परिस्थिति कायम नभए पछि सरकारबाट बाहिरिएको उनले बताए। सरकारलाई गुण र दोषको आधारमा समर्थन र विरोध गर्दै प्रतिपक्षमा बस्ने निर्णय गरिएको उनको भनाइ छ।