विराटनगर, ३ चैत । सञ्चारगृहलाई आवश्यक पर्ने दक्षजनशक्तिको पूर्तिका लागि पत्रकारिता सम्वन्धि सात दिने आधारभूत तालीम सोमबार विराटनगरमा सम्पन्न भएको छ। नेपाल पत्रकार महासङ्घ केन्द्रीय कार्यालय काठमाडौ र मोरङ शाखाद्वारा संयुक्त रुपमा सञ्चालित तालिममा मोरङ, सुनसरी, झापा, धनकुटा, सप्तरी, सिरहा र उदयपुरका ३० जना महिला सहित ४२ जनाको सहभागिता रहेको थियो ।

तालिमका प्रशिक्षाथीहरुलाई सैद्धान्तिक र व्यवहारिक ज्ञानका लागि स्थलगत रुपमा समाचार सङकलन गराइएको थियो । एक देखि दुई वर्षसम्म विभिन्न सञ्चार गृहमा कार्य गरिरहेका प्रशिक्षार्थीहरुलाई महासङ्घका पूर्व सभापति धर्मेन्द्र झा लगायतले प्रशिक्षण दिएका हुन् ।

महासङ्घका प्रदेश नं १ का सभापति बिक्रम लुईटेलले प्रमाणपत्र वितरण गर्दै समाज, भुगोल , जातजाति लगाएतका क्षेत्रमा राम्रो अध्ययन गरी कार्य गरेमा अगाडि वढ्न सकिने बताए । उनले वर्तमान अवस्थामा पत्रकारिता पेशाबाट निरासा हुने अवस्था नरहेको चर्चा गर्दै पत्रकारिता क्षेत्रमा सत्य, तथ्यका साथै प्रविधिको प्रयोग गर्न आग्रह गरे ।

प्रादेशिक सञ्चार प्रतिष्ठानका कार्यकारी निर्देशक यज्ञ शर्माले मिडिया क्षेत्रमा दक्ष जनशक्तिको खाँचो टड्कारो रुपमा रहेको बताउदै समाजमा रहेको कुरिति नियन्त्रणका लागि आफ्नो क्षेत्रबाट भूमिका खेल्नु पर्नेमा जोड दिए ।