ताप्लेजुङको मेरिङदेन गाउँपालिका–३ स्थित दोभान बजार लागेको आगो नियन्त्रणमा आएको छ । मंगलबार बिहान ९ बजेदेखि सुरु भएको आगलागी दिउँसो मात्रै नियन्त्रणमा आएको हो । ताप्लेजुङकी सहायक प्रमुख जिल्ला अधिकारी गायत्रा अधिकारी खड्काले दमकल, स्थानीयबासी र सुरक्षाकर्मीको सहयोगमा आगलागी झण्डै पाँच घण्टापछि नियन्त्रण आएको जानकारी दिइन् ।

आगलागीबाट दोभान बजारका ४९ घर जलेर नष्ट हुँदा डेरा गरी बसेकासहित ७१ परिवार विस्थापित भएका छन् । ‘आगलागी पूर्ण रुपमा नियन्त्रणमा आएको छ ,’ ताप्लेजुङका सहायक प्रजिअ खड्काले शिलापत्रसँग भनिन्, ‘आगलागीबाट ४९ घर जलेर नष्ट भएका छन् । डेरावाल २२ परिवार पनि विस्थापित भएका छन् । ’

आगलागीबाट भएको क्षतिको पूर्ण विवरण भने बुधबारसम्म आउने उनले बताइन् । ‘अहिले क्षतिको विवरण ठ्याक्कै यति नै भन्न सक्ने अवस्था छैन ,’ उनले भनिन् ।

सहयक प्रजिअ खड्काले आगलागीबाट विस्थापित परिवारलाई राहत उपलब्ध गराउन सुरु गरिएको बताइन् । उनले स्थानीय तह, रेडक्रस र उद्योग वाणिज्य संघसँगको समन्वयमा विस्थापितलाई राहतको काम थालिएको जानकारी दिइन् ।

‘विस्थापितको राहत र पुनर्स्थापनाको काम अघि बढाइएको छ । अहिले तत्काललाई लगाउने र सुत्ने लत्ताकपडा रेडक्रसले दिएको छ भने उद्योग वाणिज्य संघले अहिले खाने बस्ने व्यवस्था गरेको छ ,’ उनले भनिन् ।

उनका अनुसार बजार क्षेत्र भएका कारण आगलागीबाट कपडा पसल, कृषि सामग्रीका पसल, किराना पसलहरू तथा भण्डारण गरिएका अलैंची लगायतका कृषि उत्पादन जलेर पूर्णरुपमा नष्ट भएका छन् ।

आगलागीको कारण भने सुल्न नसकेको उनले बताइन् । ‘आगलागी कसरी भयो भन्ने विषय खुल्न सकेको छैन, ’ उनले भनिन्, ‘कतै विद्युत सर्ट भएर लागेको हुनसक्छ । ’ दोभान बजार ताप्लेजुङ सदरमुकाम फुङलिङदेखि करिब डेढ घण्टाको दूरीमा पर्दछ ।